Në ditën e 50-të të protestës në çadër, kreu i PD-së Lulzim Basha ka hedhur një paralele mes sulmit amerikan mbi një bazë ushtarake siriane dhe realitetit aktual në politikën shqiptare. Basha vlerësoi aksionin ushtarak me raketa Tomahok nga administrata Trump, duke thënë se ky është një rikthim i kartës morale të Amerikës në emër të vlerave dhe të drejtave të njeriut.
Sipas tij, në emër të këtyre vlerave po proteston dhe opozita në Shqipëri. Dhe në nëntekst të fjalës së Bashës, ishte mesazhi se ashtu siç amerikanët po ndërhyjnë në Siri në mbështetje të vlerave kundër një diktatori si Bashar al Asad, ashtu do ndërhyjnë dhe në Shqipëri për t’i thënë “ndal” Edi Ramës.
Gjithashtu, në fjalimin e paradites Basha sulmoi sërish një pjesë të medias, duke thënë se janë të lidhura me pushtetin për të mbrojtur interesat e tyre korruptive. Basha përmendi me emër Henri Çilin si të tillë, njeriun që gjashtë vite më parë e mbështeti vetë Bashën në fushatën për kreun e Bashkisë së Tiranës. /tesheshi.com/
