Nisja e shkëlqyer e këtij viti tenistik për ish-numrin një të botës Roger Federer ka vijuar dje me fitimin e trofeut të tretë brenda pak muajsh.
Australian Open, Indian Wells Masters, dhe tani Miami Open. Dhe në dy turne, në të parin e në të tretin, finalisti përballë ka qenë i njëjti, Rafa Nadal. Spanjolli është mundur dhe në Indian Wells, por diçka më para finales.
Me fitoren e djeshme 2-0 ndaj Nadal-it, Federer e bën të tijin për të tretën herë trofeun e turneut Miami Open. Krejt ndryshe me kundërshtarin e tij, që humb finalen e pestë në këtë turne.
Federer, tanimë 35-vjeç, ka vendosur të pushojë pas kësaj fitoreje, për t’u përgatitur për French Open-in, turneun e dytë Grand Slam të vitit.
“Kur jam i shëndetshëm dhe ndjehem mirë, mund të ofroj tenis si ky. Kjo është arsyeja pse vjen ky pushim. Nuk jam më 24 vjeç. Gjërat kanë ndryshuar goxha, dhe mbase nuk do të luaj në ndonjë aktivitet në fushat me dhé veç atij në Francë.”
Suksesi i këtij sezoni për Federer-in mund të krahasohet me atë të 2006-s, kur ai fitonte 33 prej 34 ndeshjeve të para të vitit, teksa ka fituar në këto tre muaj e pak 19 ndeshje e ka humbur vetëm një. /tesheshi.com/
