Një rebelim që nisi të dielën pasdite në një burg të shtetit të Bahias në Brazil mori fund dje me lirimin e 70 pengjeve, por u mori jetën nëntë personave, njërit prej të cilëve iu pre koka.
Policia lajmëroi se të burgosurit vranë tetë prej bashkëvuajtësve në burg pas nisjes së rebelimit gjatë vizitës së familjarëve, dhe një tjetër humbi jetën të hënën nga plagët.
Të burgosurit e armatosur me thika morën peng vizitorët, e mes tyre gra e fëmijë, dhe kërkuan të flasin në lidhje me kushtet e tyre me zyrtarët e komisionit lokal për të drejtat e njeriut.
Drejtori i burgut u tha reporterëve se trazirat kishin nisur nga një konflikt midis bandave rivale.
Ky burg ka aktualisht 1.467 të burgosur, ndërsa kapaciteti i tij është vetëm për 644 të tillë.
Mbipopullimi i burgjeve braziliane është një prej faktorëve që nxit revoltat e njëpasnjëshme në to, e kushtet e tyre janë përshkruar si mesjetare nga vëzhguesit ndërkombëtarë.
