Tashmë është zyrtare. Regjimi iranian fajëson për protestat që po zhvillohen në shumë qytete të vendit, opozitën e nxjerrë jashtë sistemi MEK, e cila qendrën kryesore e ka në Tiranë dhe Paris.
Presidenti Hassan Ruhani ka telefonuar homologun francez Emanuel Macron dhe i ka kërkuar të arrestojë kreun e Këshillit Kombëtar të Rezistencës së Iranit, Maryem Rajavi.
“Ne kritikojmë faktin që grupi MEK ka bazë në Francë, ndaj ju kërkojmë të veproni ndaj grupit terrorist MEK që ka organizuar protestat kundër vendit tim”, i ka thënë Ruhani Macron-it, sipas televizionit Francez TF1.
Autoritetet iraniane akuzojnë opozitën e muxhahidinëve se janë një grup që funksionon si lidhje e Arabisë Saudite dhe interesave të saj.
General Rassul Sanairad, numri dy i Rojeve Revolucionare akuzoi Arabinë Saudite se ka trajnuar muxhahidinët për të ndërmarrë një kryengritje ndaj regjimit.
Rreth 2 mijë muxhahidinë prej dy vjetësh ndodhen në Tiranë dhe janë vendosur pranë City Park. /tesheshi.com/
