Raheem Sterling do të bëhet njëri prej futbollistëve më të shtrenjtë në histori të futbollit, pas transferimit në Manchester City nga Liverpooli. Sulmuesi anglez do t’ju kushtojë “Citizens’ 68 milionë euro. Njihuni me top transferet që e bënë historinë e futbollit
Raheem Sterling do ta shkruajë emrin e tij në histori të futbollit. Jo pse ka arritur ndonjë sukses me ekipin e tij të deritashëm, Liverpool, por për vlerën e tij.
Në fakt, sulmuesi anglez pritet t’i kushtojë Manchester Cityt, i cili do ta blejë atë, plot 68 milionë euro, duke u futur kështu në mesin e dhjetë transfereve më të shtrenjta në histori të futbollit.
Pa dyshim, mbret në këtë aspekt është Gareth Bale, i cili i kushtoi Real Madridit 100 milionë euro, kur e bleu nga Tottenhami.
Ndërkaq, pozita e dytë është rezervuar për Cristiano Ronaldon, të cilin, “Los Blancos” e bleu 94 milionë euro nga Manchester United.
I treti në listë, me shifër të njëjtë, është Luis Suarez, të cilin Barcelona e bleu vitin e kaluar nga Liverpooli. Real Madridi është gjithnjë prezent kur janë në pyetje shpenzimet marramendëse.
Klubi spanjoll e sheh veten edhe në pozitën e katërt, pasi e kishte blerë James Rodriguezin nga Monaco për afro 80 milionë euro.
E në pozitën e pestë shihet se gjiganti madrilen ka përfituar para më në fund duke e shitur Angel Di Marian në Manchester United për 75 milionë euro, vitin e kaluar.
Në vazhdim mund ta shihni listën e plotë të 15 transfereve më të shtrenjta në histori të futbollit, përfshirë këtu emrin, mbiemrin, klubin që e shiti, klubin që e bleu dhe vlerën.
Transferet më të shtrenjta në histori
1) Gareth Bale (Tottenham – Real Madrid) 100 milionë euro;
2) Cristiano Ronaldo (Manchester United – Real Madrid) 94 milionë;
3) Luis Suarez (Liverpool – Barcelona) 94 milionë;
4) James Rodriguez (Monaco – Real Madrid) 79.5 milionë;
5) Angel Di Maria (Real Madrid – Manchester United) 75 milionë;
6) Zinedine Zidane (Juventus – Real Madrid) 75 milionë;
7) Zlatan Ibrahimovic (Inter – Barcelona) 69 milionë;
8) Raheem Sterling (Liverpool – Manchester City) 68 milionë;
9) Kaka (Milan – Real Madrid) 65 milionë;
10) Edinson Cavani (Napoli – Paris Saint-Germain) 64 milionë;
11) David Luiz (Chelsea – Paris Saint-Germain) 62.6 milionë;
12) Luis Figo (Barcelona – Real Madrid) 62 milionë;
13) Radamel Falcao (Atletico Madrid – Monaco) 60 milionë;
14) Fernando Torres (Liverpool – Chelsea) 58 milionë;
15) Neymar (Santos – Barcelona) 57 milionë. /tesheshi.com/
