Sekretari i Përkohshëm i Mbrojtjes i SHBA, Christopher Miller tha se Garda Kombëtare e Uashingtonit është aktivizuar për shkak të trazirave në ndërtesën e Kapitolit.
Ai tha se bisedoi me Shefin e Shtabit të Ushtrisë Amerikane Mark Milley, Zv.presidentin Mike Pence, Kryetaren e Dhomës Nancy Pelosi, udhëheqësin e Shumicës së Senatit Mitch McConnell, udhëheqësin e Minoritetit të Senatit Chuck Schumer dhe përfaqësuesin e Maryland-it, Steny Hoyer.
Miller theksoi se Garda Kombëtare në Uashington është aktivizuar plotësisht.
Gati për të siguruar mbështetje shtesë
“Nëse autoritetet lokale kërkojnë, ne jemi të gatshëm të sigurojmë mbështetje shtesë. Stafi ynë ka bërë një betim për të mbrojtur Kushtetutën tonë dhe rendin demokratik dhe do të veprojë në përputhje me rrethanat,” tha Miller.
Forcat e sigurisë më parë kishin gjetur dhe neutralizuar një pajisje shpërthyese jo shumë larg Kongresit.
Skena dhune dhe kaosi përshkuan Kapitolin, selinë e demokracisë amerikane, e cila, megjithë gazin lotsjellës të policisë, u pushtua nga një turmë mbështetësish të Presidentit në largim Donald Trump për të përmbysur rezultatet e zgjedhjeve dhe për të ndalur një sesion të Kongresit që do të konfirmonte fitoren e Presidentit të ri Joe Biden.
Skenat kaotike pasuan pasi Trump iu drejtua mbështetësve të tij pranë Shtëpisë së Bardhë dhe përsëriti akuzat e pabazuara për mashtrim zgjedhor. /tesheshi.com/
