Disa kompani me emër të transportit ajror, si Air Berlin, Air Canada dhe Easy Jet, deklaruan të enjten se do t’u kërkojnë dy pjesëtarëve të ekuipazhit të jenë gjithmonë të pranishëm në kabinën e pilotëve.
Pasi u njoftua një ditë më parë se njëri nga pilotët e Germanwings-it ishte kyçur në kabinën e pilotëve dhe e kishte përplasur me dashje avionin në male, një numër kompanish të njohura kanë ndërmarrë hapa për të propozuar rregulla të reja për kabinën e pilotëve, për të garantuar qëndrimin gjithmonë brenda saj të dy pjesëtarëve të ekuipazhit.
Plani do t’u paraqitet sot autoriteteve gjermane të aviacionit, dhe kompanitë e transportit ajror do t’i vënë rregullat në zbatim sa më shpejt të jetë e mundur.
Një hap të tillë e ka bërë dhe qeveria kanadeze, e cila lëshoi një urdhër të menjëhershëm, që u kërkon dy pjesëtarëve të ekuipazhit të jenë gjatë gjithë kohës në kabinën e pilotëve. Lisa Raitt, ministrja e Transportit, tha se qeveria po i risheh të gjitha politikat dhe procedurat, e po e ndjek nga afër situatën në Europë.
Pas ngjarjeve të 11 shtatorit 2001, kompanitë amerikane të transportit ajror u bënë rregullime politikave të tyre në lidhje me personelin në kabinën e pilotëve. Por kjo procedurë nuk është standarde në Europë apo në Kanada.
Kështu, mes të tjerash, nëse njëri nga pilotët largohet për në banjë, vendin e tij në kabinën e pilotëve e zë një prej pjesëtarëve të tjerë të personelit.
Procedura të ngjashme ndjekin disa kompani europiane të transportit ajror, si Finnair dhe CSA, kompania shtetërore çeke. Por kjo praktikë nuk zbatohej deri më sot në shumë kompani të tjera. /tesheshi.com/
Hetuesit europianë deklaruan se piloti i Germanwings-it, Andreas Lubitz, ishte mbyllur në kabinën e pilotëve të Airbus-it dhe në mënyrë të qëllimshme e kishte përplasur mjetin në mal, duke sjellë vdekjen e të 150 personave në avion. /teheshi.com/
