Një anije me 600 refugjatë në të është mbytur pranë brigjeve egjiptiane. Bilanci është tragjik: 43 janë të vdekur, 154 janë shpëtuar, por ende nuk dihet fati i qindra të tjerëve.
Anija është përmbysur pranë brigjeve të Kefr esh-Shejhit, rreth 140 kilometra në veri të Kajros.
Zyrtarët vendas kanë raportuar për 31 trupa të nxjerrë nga uji, 20 meshkuj, dhjetë femra dhe një fëmijë. Një anije peshkimi ka nxjerrë në breg po ashtu 12 trupa, duke e çuar numrin e të vdekurve në 43.
154 prej të gjendurve në anije janë shpëtuar, e po kërkohet intensivisht për të mbijetuar të tjerë.
Egjiptianë, sirianë, e afrikanë të tjerë gjendeshin në anije. Mjeti lundruese mendohet të jetë përmbysur për shkak të numrit të madh të personave në të.
Besohet se anija ishte nisur drejt Italisë, siç bëjnë të ditura media të ndryshme.
Incidente të tilla janë të përsëritura në brigjet afrikanoveriore. Sipas Organizatës Ndërkombëtare për Migracionin, Mesdheun e kanë kaluar këtë vit 206.400 refugjatë. 2.800 ka qenë numri i viktimave në gjashtë muajt e parë, nga janari në qershor. Libia, por edhe Egjipti shërbejnë shpesh si pikënisje për të pashpresët. /tesheshi.com/
