Radhën në PD për t’u kryqëzuar nga modeli “Berisha”, e ka Alibeaj. Eshtë fjala për atë lloj tradite në këtë forcë ku kundërshtarit, si atij të jashtëm e si atij të brendshëm, i sajohet një dosje me të zeza korruptive apo kriminale.
Kështu, për njeriun që mban postin e kreut të komanduar të PD-së, pas dorëheqjes së Bashës, i shfaqur stoik kundër Berishës dhe kthimit të tij në parti, duke ia thënë këtë dhe në sy, RD, organi demokrat që mbahet nën kontrollin e Rithemelimit, një PD nr.2 kjo, shkruan se për Alibeajn ka denoncime nga Paraguaji.
RD shkruan, referuar postimit të atij që thuhet së është diplomat paraguajan, Blas Oddone, se “Ministria Publike e Republikës së Paraguajit duhet të hetojë mbështetjen financiare dhe bankare të Carlos Fernández Valdovinos dhënë politikanit të korruptuar shqiptar Enkelejd Alibeaj”.
Po ashtu, RD sjell dhe postimin e një gazetari paraguajan, të quajtur Pedro Escobar Medina, sipas së cilit, “Ministria Publike në shtetin e tij të hetohet mbështetja që ekonomisti Carlos Fernández Valdovinos ka dhënë ndaj deputetit të PD, Enkelejd Alibeaj”.
Megjithatë, RD tregohet e përmbajtur kur shkruan se “është e paqartë se për çfarë e akuzojnë konkretisht dy paraguajanët Alibeajn. Theksojmë se dy profilet e personave të përmendur më lartë janë të paverifikuar në Twitter, dhe se me emrin Blas Oddone ekziztojnë të paktën tre profile të njëjta, duke ngritur dyshimet se mund të jenë të rreme”.
Ndërsa për Carlos Fernández Valdovinos shkruan se “është një nga bankierët më të njohur në Paraguaji. Ai ka shërbyer si Guvernator i Bankës Qendrore të Paraguajit nga viti 2013 e deri në 2018”.
Kështu, radhën e ka Alibeaj që të jetë tashmë në shënjestër, sipas një tradite të mbrapshtë, nga e cila e pësoi dhe Basha, ku nga engjëll u shndërru në djall brenda një dite, sapo ndryshoi qëndrim politik ndaj Berishës. /tesheshi.com/
