Nga Blendi Gashi
E bija e Presidentit Rugova, Teuta, ka regjistruar një tjetër akt të paprecedent politik, pak ditë pasi befasoi opinionin kosovar me dy qëndrime diametralisht të kundërta brenda një ore, duke thënë për të parin se “e kishin keqkuptuar”. Këtë të enjte, ne seancën e parë të Kuvendit të Kosovës pas zgjedhjeve të 11 qershorit, ajo ngiti dorën “pro” PAN-it lidhur me kërkesën për shtyerje seance, duke u rreshtuar kështu në krahun e luftës e tradhëtuar politikisht LDK-në e saj dhe të babait të saj.
Ajo, që në mëngjes, me mosardhjen në seancë së bashku me LDK-istët e tjerë, i bëri të ditur Isa Mustafës se nuk është në vijë me të, dhe se do ta dëgjojë vëllain e saj, ish-deputetin Ukë Rugova që është mik i mirë i Haradinajt dhe kështu do t’i japë votën PAN-it.
Dora e Teutës sot ishte një tronditje e re për LDK-në e cila tani nuk ka ndonjë arsye të thirret në figurën e Ibrahim Rugovës dhe rugovizëm, siç bën në vijimësi, por vetëm mund ta kujtojë si lider historik të partisë dhe themelues.
Nuk mund të thirret pasi që si i biri, pra Uka, i cili vite më parë ja mbajti krahun Ramushit duke hyrë në listë me të, tash të njëjtën gjë po e bën edhe Teuta që nuk është njëzëri me qëndrimet e partisë por haptas anon tek “koalicioni i luftës” qoftë edhe pa dëshirën e saj.
Reagimet nga LDK
Vendimi i Teutës nuk i ka pëlqyer aspak drejtuesve të LDK-së, të cilët ndihen të skuqur nga veprimi i saj.
Isa Mustafa, me të kuptuar “tradhëtinë” nga Teuta tregoi fytyrën e tij duke thënë se ata që shkelin qëndrimet e partisë cenojnë vlerat e saj.
“LDK është parti e idesë dhe rrugës së Ibrahim Rugovës. Ata që shkelin qëndrimet e LDK-së cënojnë vlerat më sublime të saj”, tha Mustafa përmes një postimi në Facebook.
Veprimi i Teutës aspak nuk i ka pëlqyer as bashkëpartiakëve të tij.
“Një dorë e ngritur sot në Kuvend, na bëri të skuqemi nga turpi”, tha deputeti Haxhi Avdyli.
A do përjashtohet Teuta?
Reagimet e Mustafës por edhe deputetit Avdyli janë një sinjal i qartë se Teuta për ta është një “tradhëtare” dhe këtë epitet ajo mund ta zyrtarizojë me votimin për Kadri Veselin-kryekuvendar dhe Ramush Haradinajn-kryeministër.
Nëse ndodh, padyshim që Teuta nuk do jetë më e përkëdhelura e LDK-së dhe krerëve të saj.
Por pyetja që kërkon përgjigje në ditët e ardhshme është: A do të guxojë LDK ta ndëshkojë bijën e presidentit Rugova apo do të mbyllë sytë para veprimeve të saj?
Një gjë e tillë mund të ndodhë nëse kihen parasysh veprimet anti-parti sidomos të ish-deputetit Shpejtim Bulliqi i cili u bë i padëshiruar pas qëndrimit kundër për Demarkacionin, për çka më pas u ndëshkua dhe nuk u fut në listën për deputet.
Por sigurisht se Teuta ka një peshë tjetër brenda LDK-së, jo për faktin se ka dije më shumë se Bulliqi por pikërisht për faktin se është bija e presidentit Rugova për çka edhe hyri në listë për deputet, edhe pse ishte deputetja më e dobët e legjislaturës së kaluar.
I mbetet LDK-së të marrë qëndrim për Teutën. Megjithatë nuk është fare çudi që ajo të bëhet pjesë e AAK-së apo grupit parlamentar të PAN-itm për çka do i jepte një goditje edhe më të fortë partisë së saj, njëjtë siç bëri vëllai i saj Uka kur vite më parë hyri në listën zgjedhore të partisë së Ramushit.
Ditët në vazhdim sigurisht se do të mësohet rruga politike e Teutës. /tesheshi.com/
