Fernando Torres u prit tepër ngrohtë në stadiumin ku ka patur kulmet e karrierës së tij vetëm pak ditë pas asaj përplasje të frikshme që shkaktoi frikë te çdokush në fushë e jashtë saj.
“Vicente Calderon” e duartrokiti fort sulmuesin që u la në tribunë sot; një pushim i nevojshëm për të. I buzëqeshur dhe i veshur këndshëm, Torres nuk kishte asnjë gjurmë nga përplasja që e la përdhe mbrëmjen e së enjtes. Veç duartrokitjeve, në stadium kishte dhe një banderolë mbështetëse për të.
Sa për takimin, atë ndaj Valencias, Atletiko e Madridit imitoi rezultatet e djeshme të Realit të Madridit dhe Barcelonës, duke fituar pastër e bindshëm.
Nëse Reali fitoi dje 1-4 ndaj Eibarit, e nëse Barcelona mposhti 5-0 Selta Vigon, Atletiko i shënoi tre gola Valencias, pa pësuar asnjë vetë.
Griezmann i shënoi dy prej golave në fitoren 3-0, një pak minuta pas nisjes së pjesës së parë, e një tjetër pak minuta para mbarimit të ndeshjes. Gameiro realizoi në fillimin e pjesës së dytë.
Atletiko arrin të mbajë vendin e katërt në klasifikim me këtë fitore, veçse e shkëputur disi nga kryesuesit. /tesheshi.com/
