Prej kohësh ai nuk është më kryeministër i Britanisë, por e gjen ngado. I lavdëruar, i kritikuar, i akuzuar, Tony Blair mbetet një figurë e dëshiruar për mjetet botërore të informimit.
Në një intervistë ekskluzive për Fareed Zakaria-n e CNN-it, të planifikuar për t’u transmetuar sot në valët e këtij televizioni, Blair detyrohet të flasë edhe një herë për pushtimin e Irakut në vitin 2003, për rrëzimin e Sadam Huseinit, e për atë çka do të pasonte më pas.
Blair thotë në këtë intervistë se nuk ndjen keqardhje për rrëzimin e Sadam Huseinit, por e pranon gojëhapur se është i brengosur për “gabimet” e bëra gjatë pushtimit të Irakut dymbëdhjetë vite më parë.
Pjesë e intervistës së tij është dhe një ndjesë e detyruar, duke i referuar pretendimit të shumëpërfolur të asaj kohe se regjimi irakian posedonte armë të shkatërrimit në masë. Diçka e përdorur si justifikim nga SHBA-të dhe Britania për nisjen e pushtimit, veçse raportet e shërbimeve të fshehta që theksonin se ky pretendim ishte i bazuar rezultuan të rreme.
“Mund të them se kërkoj ndjesë për faktin se informacioni që morëm ishte i gabuar, ngaqë, edhe pse ai (Sadam Huseini) kishte përdorur gjerësisht armë kimike kundër popullit të tij, kundër të tjerëve, programi në formën që ne menduam se ishte nuk ekzistonte ashtu.”
Tony Blair-it kërkon ndjesë dhe për ca gabime në planifikim, si dhe për gabimin në të kuptuarit se çfarë do të ngjiste me t’u hequr qafe regjimi irakian.
Kur vjen puna te ISIS-i dhe lindja e tij, ish-kryeministri britanik i pohon intervistuesit se ka “elemente të së vërtetës” në pikëpamjen se pushtimi i Irakut në 2003-shin ishte shkaku kryesor i lindjes së ISIS-it.
“Sigurisht, nuk mund të thoni se ata nga ne që e larguan Sadamin në 2003-shin nuk kanë përgjegjësi për situatën në 2015-ën.”
Ama Blair shton më tej, “Por është e rëndësishme gjithashtu të kuptohet, e para, se Pranvera Arabe, e cila nisi në vitin 2011, do të kishte patur po ashtu ndikim sot në Irak, dhe, e dyta, se ISIS-i u shfaq në të vërtetë nga një bazë në Siri, e jo në Irak.”
Zakaria i ka lënë vend në pyetjet e tij dhe një të tille të sikletshme, kur e pyet Blair-in për etiketimin e tij si “kriminel lufte” për vendimin për të pushtuar Irakun. “Çdonjëri mund të ketë gjykimin e tij mbi këtë,” përgjigjet britaniku, por shton se bëri atë që mendonte se ishte e drejtë në atë kohë.
Iraku prej atij pushtimi është zhytur në kaos të thellë, ndërsa mijëra banorë të tij kanë humbur e vazhdojnë të humbin jetën. Në krahun tjetër, 4.000 trupa amerikane janë vrarë gjatë konfliktit. /tesheshi.com/
