Zhvillimi më i fundit në krizën e PD-së, ku me vendim gjykate PD i kalon Rithemelimit, pra Berishës, ka provokuar dhe një kritikë të fortë ndaj një figure që deri më tani ishte i imunizuar nga kritikat, aq më pak akuzat. Ky është Tomorr Alizoti, i një ndër të rrallët të djathtë tradite në këtë parti, pasardhës i Alizotajve me nam të Shqipërisë, të cilët regjimi komunist i përsekutoi rëndshëm.
Tomor Alizoti, edhe pse jo me aftësi të spikatura politike për të qenë lider politik, kishte një lloj qasjeje që e bënte të dallueshëm nga pjesa tjetër e kolegëve të tij demokratë.
Por për shkak të një qëndrimi të fundit, ai është fshikulluar rëndë nga ndër demokratët më të njohur beratas, në zonën ku është deputet, Namir Lapardhaja. 
Ky i fundit, me qëndrim të hapur e të qartë anti-Berisha, ka mbetur i zhgënjyer nga Alizoti, duke treguar arsyen se pse dhe kamzhikuar sjelljen e tij politike.
“Tomorr Alizoti i dha fund qëndrimeve të tij pa qëndrim dhe pa ngjyrë politike, kur deklaroi në një emision televiziv se qenka marrëzi ankimimi i një vendimi, pasi partia na është një bashkim vullnetar.
Ky pinjoll i familjes me emër të madh, që karrierën politike e ka dhuratë nga mbiemri, harroi për një moment që në politikë përmbajtja dhe jo forma populiste, integriteti dhe jo zvarritja, janë cilësitë që i japin nder emrit dhe mbiemrit.
Alizoti, mbështetës publik i z. Basha kur ai u rizgjodh vitin e shkuar pas humbjes së zgjedhjeve të 25 prillit, sot merr flamurin e shpalljes legjitim të Berishës, pa thënë asgjë se çfarë mendon ai realisht, edhe si zëvendëskryetar i Komisionit të Jashtëm për shpalljen ‘Non grata’ të ish-kryeministrit Berisha.
Me qëndrimet e tij as mish as peshk, sot më në fund e gjeti veten tek Foltorja, më tepër nga frika se sa nga e drejta.
Me gjasë, Berisha do ta përfillë aq sa Aldo Bumçin, por ky është dhe trajtimi i merituar për dikë që çdo gjë në politikë e ka dhuratë nga familja ose miqtë që e mbeshtetën në fillim.
Ai bashkë me shumë nga ata që pas 9 shtatorit sulmuan me çdo epitet ekstrem e banal Bashën, sot duartrokitën dhunimin e institucionit, të cilët treguan se PD-në nuk e duan për demokratët, por për dëshirat e tyre të vogla dhe për ëndrrat me kryetar partie.
Ndoshta realpolitikën Alizoti e ngatërron me futbollin, ku është e rëndësishme të gënjesh për të bërë gol, të cilin, në fakt, ai s’ka për ta bërë dot kurrë as me Berishën dhe as me atë që Berisha do caktojë sërish si pasardhës”, shkruan Lapardhaja, ndër më të kulturuarit në bazën e PD-së në aspekt të formimit individual. /tesheshi.com/
