Shqipëria, Kroacia dhe Mali i Zi kanë formuluar një kërkesë zyrtare ndihme ndaj administratës së Donald Trump, duke deklaruar se janë në “shënjestër” të Rusisë.
Tre ministrat e Jashtëm të tre vendeve i kërkojnë Uashingtonit një takim të përbashkët për këtë axhendë.
Ditmir Bushati, Davor Ivo Stier dhe Sërgjan Darmanoviç janë mbledhur në një takim trelateral në Kroaci, ku njëzëri kërkojnë takim me sekretarin amerikan të shtetit, Rex Tilerson jo si shtete por si anëtarët e NATO-s në Ballkan.
Qëllimi i kësaj kërkese janë sfidat e sigurisë, marrëdhënia me Rusinë, anëtarësimi i Malit të Zi në NATO si dhe situata në rajon.
Në komunikatën e ministrisë së Jashtme shqiptare theksohet se “ky takim Trepalësh kishte për synim transformimin në një platformë bashkëpunimi dhe promovimi të stabilitetit rajonal mbi bashkëpunimin në fushën sigurisë e ekonomisë, infrastrukturës, transportit, mjedisit, turizimit dhe energjisë duke u ndalur kryesisht në bashkërendimin mes tre vendeve që realizimi i gazsjellsit adriatiko-jonian të përbëjë prioritet për vendet e BE-së. Në fokus të takimit ishte edhe dimensioni i sigurisë, lufta ndaj rrezikut terrorist, në mbrojtje të vlerave tona të përbashkëta dhe respektimit të lirive dhe të drejtave themelore të njeriut. Në ndërhyrjen e tij, Ministri Bushati vlerësoi bashkëpunimin tashmë të konsoliduar në këtë format trepalësh dhe riafirmoi qëndrimin dhe rolin e Shqipërisë në funksion të forcimit të bashkëpunimit të vendeve tona, në fushat e mësipërme, të interesit të përbashkët. Takimi tjetër i ketij formati trepalësh do të mbahet në një qytet tjetër të Europës Adriatike, në Durrës”, theksoi Bushati.
Tre ministrat ranë dakord për konsultime të ngushta dhe qasje të përbashkët në përgatitje të samitit të ardhshëm të NATO-s, si dhe diskutuan mbi mundësinë e kryerjes së takimeve trepalëshe me administratën e re në SHBA, si një mundësi për një qasje të bashkërenduar në përballimin e sfidave me të cilat perballet rajoni ynë dhe konsolidimin e kursit euro-atlantik të vendeve tona. /tesheshi.com/
