Sekretari amerikan i Shtetit, Rex Tillerson, arriti në Ankara ku do të zhvillojë bisedime të nivelit të lartë për luftën kundër ekstremizmit, e në mënyrë të veçantë kundër militantëve të ISIS.
Departamenti i Shtetit njoftoi se bisedimet e Tillersonit me presidentin turk, Recep Tayyip Erdogan, dhe zyrtarë të tjerë të qeverisë do të fokusohen në hapat e tjerë të fushatës për mposhtjen e ISIS në Siri dhe Irak.
Ankaraja kërkon nga Uashingtoni të përfshihen në një betejë të përbashkët për rikthimin e kotrollit të qytetit Raka, që është bastioni i fundit i militantëve në Siri. Në lidhje me këtë plan, Ankaraja dëshiron që kurdët sirianë, të cilët gëzojnë mbështetjen e SHBA-së, të përjashtohen nga operacionet.
Bisedimet e sotme pritet të prekin edhe kërkesën e Ankarasë për ekstradimin nga SHBA-ja të klerikut fetar, Fethullah Gulen.
Autoritetet turke kërkojnë esktradimin e tij nën dyshimet se ka organizuar përpjekjen për grusht shteti në Turqi, korrikun e kaluar. /tesheshi.com/
