Bajerni i Mynihut nuk është mësuar të japë yje dhe lojtarë që kanë bërë epokë. Po bëhej kohë që fansat bavarezë nuk kishin përjetuar ndonjë dramë të madhe në merkato, ashtu siç e përjetuan nga ana sportive në finalen e Champions-it 2012. Largimi i Bastian Shvajnshtaigerit ka irrituar “mushkërinë” e Bajernit, tifozët bardhekuq.
Bosi i Bajernit, Rumenige, ua tha drejtpërdrejt lajmin 70 mijë spektatorëve të pranishëm gjatë prezantimit të skuadrës, ku Shvajni mungoi. Pas atij njoftimi zyrtar, tifozët kanë shpërthyer në kritika në rrjetet sociale duke mbetur të pakënaqur me politikat dhe strategjitë e klubit. Humbja e liderit, ikonës, kampionit, të pamposhturit, “Zotit të futbollit” u ka thyer zemrën tifozëve në mbarë botën. Ja disa nga citatet e tifozëve në internet.
“Me Uli Hënesin kjo nuk kishte për të ndodhur. Në një ditë të afërt Uli Hënes do rikthehet. Nën udhëheqjen e tij, Shvajnshtaiger dhe Myler-Volfart do ishin në zemrën e Mynihut”, shkruan Andreas Muth në “Twitter”. Fansi tjetër “el phenomenon” shkruan: “Ju garantoj: Nën drejtimin e Uli Hënesit, Bastian Shvajnshtaiger s’do kishte surrat të kërkonte largimin”.
Ultrasi Bryan proteston: “Bajern, si mund të rrëzosh atë çka ke ndërtuar në një dekadë? Ky nuk është Bajerni im. Mungon Hënes”. Kritikat ndaj Rumeniges s’reshtin: “Bajerni ka nevojë për më shumë Uli Hënes dhe sa më pak Rumenige”. Në shumicë, tifozët i bëjnë thirrje rikthimit të ish-presidentit Uli Hënes. Vetëm nën drejtimin e tij lojtarët do ndihen ngrohtë, si një familje e bashkuar. Edhe grupi i fansave “la besia negra” në “Facebook” ka ngritur një shqetësim.
“Pas zbehjes së rolit të Uli Hënesit, Bajernin po e merr lumi. Vajzer iku! Pizarro një figurë nder gjithashtu. Talentet Gërtler dhe Shtrider u larguan. Vjet na iku Kros dhe sivjet Shvajni. Superlojtarë s’po blihen. Neve na është prerë gjuha”, shkruan grupi “macja e zezë”. /tesheshi.com/
