Një ngjarje e çuditshme ka ndodhur në politikën kosovare, pasi kryeministri Isa Mustafa ka zhvilluar një polemikë online me kreun e AAK-së, Ramush Haradinajn, por në fund e ka fshirë postimin, duke thënë se ka ndodhur si pasojë e ndërhyrjeve në rrjet. Gjithçka ngjau në fakt pas një polemike të rëndë.
Haradinaj e ka akuzuar Mustafën për çështjen e Zajednicës, dhe ka paralajmëruar se kryeministri do të arrestohet se ka shkelur Kushtetutën. Por në facebook-un e kryeministrit është shfaqur një status që shkaktoi furtunë.
“Ramushi e paska dhënë një deklaratë të fortë në Interaktiv: “Nëse arrestohen deputetët, populli do ta arrestojë Isa Mustafën… ndoshta në liqenin e Radoniqit. Populli thotë se atje ka të burgosur të ‘popullit’,” theksohet në status.
Sa për kujtesë, te liqeni i Radoniqit është zhvilluar një betejë e ashpër gjatë luftës së Kosovës, ku Zona Operative e Dukagjinit, në të cilën komandant qe Ramushi, luftoi frontalisht me serbët dhe pati mjaft të humbur.
Menjëherë pas kësaj ka reaguar gazetari Milaim Zeka, i cili ka qenë një nga dëshmitarët kryesorë të luftës çlirimtare.
“Kurrë nuk e kisha besuar!!! Kam disa orë që e kam dëgjuar një deklaratë të kryeministrit të Kosovës, dhe pasha të madhin Zot, prapë nuk po e besoj.
Fjala është për liqenin e Radoniqit. Isa Mustafa ia paska përmendë këtë Ramush Haradinajt.
Pavarësisht nga inatet, kundërthëniet apo konfliktet që mundet t’i kenë, gjuha e një kryeministri duhet te jete super e matur. Atij, e, pra, kryeministrit, në asnjë mënyrë dhe në asnjë rrethanë nuk i lejohet një gjuhë e tillë!!!
Boll ka vuajtur Ramushi për atë bazen dhe bazenet e tjera. Kryeministri nuk guxon ta përdorë atë gjuhë, jo për shkak të Ramushit, po për hir të gjakut të Luanit e të Shkëlzenit!
Kryeminister, nëse ke pak burrëri, pak nder, pak dinjitet dhe pak intelekt, dil dhe kërkoi falje Ramushit.
Përndryshe, sinqerisht, më vjen keq që vendi në të cilin kam lindur ka një kryeministër i cili e lëshon veten përtej poshtërsisë!!!”, shkruan Milaim Zeka.
Më tutje, në murin e faqes elektronike të kryeministrit Mustafa është shfaqur një frazë, që është shkruar dy herë: “Pak më parë më është dashur ta fshij një postim në llogarinë time në facebook, të postuar pa kontrollin tim,” ka theksuar Mustafa.
Ndërsa në një status tjetër ai sqaron: “Të dashur miq! Tekstin e mëparshëm e fshiva, sepse kishte ndërhyrje të paautorizuar, me gjuhë banale në komente. IM”.
Edhe pse kanë kaluar disa orë, ende mbetet mister ndërhyrja piratore apo, ndoshta, e paautorizuar në faqen e kryeministrit, që përndryshe është një skandal më vete. /tesheshi.com/
