Pas votëbesimit për herë të dytë të qeverisë së majtë radikale të Ciprasit, deputetët grekë miratuan masat e reja shtrënguese, të diktuara nga kreditorët europianë për vijimin e marrjes së huave ndërkombëtare.
Ky votim, i cili ka lidhje me projektligjin që sjell reduktime të mëtejshme të pensioneve dhe shtim të taksave, perceptohet si një provë e parë për qeverinë e Ciprasit, e dalë nga zgjedhjet e parakohshme parlamentare të 20 shtatorit, gjatë të cilave SYRIZA erdhi sërish në pushtet, për të dytën herë radhazi në tetë muaj.
154 nga 155 deputetët e koalicionit të SYRIZA-s me ANEL-in, Grekët e Pavarur, votuan pro ligjit, ndërsa 140 parlamentarë votuan kundër dhe 6 abstenuan.
Athina ka premtuar se deri në përfundim të këtij vit do të paraqesë një plan të ri gjithëpërfshirës për të përmirësuar sistemin e pensioneve. /tesheshi.com/
