Çështja më e diskutueshme e arrestimit të Metës ka qenë vendi se ku dhe si.
Duke qenë se ka gëzuar statusin e njeriut me ish-funksionet më të larta shtetërore, ndaj tij ka patur edhe një lloj empatie publike pas pamjeve të arrestimit, ku fjalë për fjalë është nxjerrë me forcë nga makina, pasi nuk ka dashur të zbatojë urdhërin e arrestimit. Për shumëkënd, vendi dhe mënyra e arrestimit të tij duhet të kish qenë më ndryshe, në rrethana më etike.
Por ngjan të ketë qenë një mesazh nga organet ligjzbatuese, siç është komentuar nga disa zëra publikë.
Për ekspertin e kriminalistikës Ervin Karamuço, procedura e ndjekur nga Policia për arrestimin e ish-presidentit Meta ka qenë e rregullt.
“Nuk kanë dashur ta arrestojnë brenda qytetit, sepse do kishte persona te selia e partisë që mund të përfshiheshin në këtë procedurë. I është afruar një oficer policie, i është prezantuar dhe ata të gjithë kanë simbolet e Policisë. I ka thënë se ka një vendim gjykate dhe i kanë thënë në jemi forcat operacionale dhe duhet t’ju shoqërojmë në Drejtorinë e Policisë së Shtetit. Aty ka filluar një agresivitet i Metës me sharje, ofendime e deri me shkelmime të pjesës së derës dhe të gjunjëve të një prej oficerëve të Policisë. Ata janë detyruar të nxjerrin forcërisht nga makina dhe ta fusin në makinën tjetër. Meta refuzonte të dilte dhe shante”.
Për juristin e komentatorin politik Kreshnik Spahiu, “arrestimi ishte mesazh për vendosjen e autoritetit drejtësisë kur politika e ka nëpërkëmbur drejtësinë. Nuk ka pengesë proceduriale që një masë sigurie ekzekutohet në rrugë. Nuk ka asnjë pengesë në kodin e procedurës penale për ekzekutimin e masës së sigurisë.”
Për juristin Romeo Kara, njeriun që e ka denoncuar Metën në SPAK për aferën CEZ-DIA, “nëse nuk pranon vullnetarisht, do përgjigjesh forcërisht”. /tesheshi.com/
