Afera politike “Babale” është pasuruar me një tjetër padi, kësaj here nga e djathta në të majtë. Është Sali Lushaj ai që së bashku me Avdyl Gjomakajn, të dy individë të afërt me rrethin e Berishës, të tipit “grup zjarri” politik, kanë paditur në gjykatë kreun e deputetëve të PS-së, Taulant Ballën. Shkak, një deklaratë e këtij të fundit karshi tyre, pak pas publikimit të një videopërgjimi me shtetasin Fredi Alizoti.
Në një prononcim për mediat jashtë dyerve të gjykatës, Lushaj u vetëquajtur “pishtar demokracie”.
“Ne nuk jemi banda e Berishës. Unë bashkë me Gjokmakaj jemi pishtarë të demokracisë. Kam derdhur gjak për këtë demokraci, vëllain e kam dëshmor të demokracisë. Më gjatë nuk kam çfarë ti them, takohemi në gjykatë”, tha ish-truproja e Berishës.
Ndërkohë, është Balla ai që ka depozituar disa padi karshi figurave të PD-së, përfshirë dhe kreun Basha, për disa akuza pos asaj që kanë të bëjnë me dosjen “Babale”.
Këtij zhvillimi që nuk po ka të ndalur, i është shtuar dhe deklarimi i një dite më parë të personazhit kryesor, Albert Veliu – Babale, i cili, në një intervistë për Top Channel, tha se i qëndronte “deri në vdekje” dëshmisë se zëri me të cilin ai ka folur në audiopërgjimin e famshëm, është ai i Agron Xhafajt, vëllait të ministrit të Brendshëm Fatmir Xhafaj. /tesheshi.com/
