Përveç faturës së borxheve të prapambetura qeveritare, atyre të reja, por edhe borxheve ndaj biznesit, një shtesë tjetër është padyshim pagesa ndaj nëpunësve që janë larguar nga administrate por kanë përfituar paratë si pasojë e Kodit të Punës apo edhe vendimeve të Gjykatave.
Siç njofton ministria e Financave, rreth 1.6 miliardë lekë apo rreth 13 milionë USD shteti shqiptar është i detyryar të paguajë faturat e prapambetura të zyrtarëve të larguar. Një burim i Ministrisë së Financave, i tha tesheshi.com se nuk bëhet fjalë vetëm për nëpunës të larguar pas 2013-s, apo pjesëtar të administratës qendrore, por edhe të larguar para 3 apo 4 vjetësh por që nuk i kanë marrë paratë pasi kanë qenë të bllokuara në thesar. Ndërkaq një pjesë e mirë e këtyre punonjësve janë ish’nëpunës të bashkisë së Tiranës që u larguan pas ikjes së LSI nga koalicioni me Partinë Demokratike.
Nga buxheti i shtetit është paguar një faturë të rëndë për shkarkimet që janë bërë në administratë, kryesisht gjatë rrotacioneve politike.
Ministria e Financave ka llogaritur si detyrime të prapambetura të gjitha borxhet që shteti kishte krijuar ndaj të larguarve nga administrata deri në fund të vitit 2013. Në të dhënat e fundit të Ministrisë së Financave mësohet se, në kuadër të strategjisë për shlyerjen e
detyrimeve të prapambetura deri më datë 10 Qershor 2015, Ministria e Financave ka alokuar në total rreth 14.6 miliardë lekë detyrime.
Nga të dhënat që Ministria e Financave bën publike, rezulton se, ka shlyer nga vendimet gjyqësore që janë kryesisht zëri i fondeve që i dedikohen të larguarave nga puna një shumë prej 1.6 miliardë lekësh.
/tesheshi.com/
