Presidenti Hashim Thaçi, pas këmbënguljes së SHBA-ve dhe NATO-s që ushtria të themelohet përmes ndryshimeve kushtetuese, siç duket, është dorëzuar duke hequr dorë nga nisma e tij që transformimi i FSK-së të bëhet përmes ndryshimit të ligjit.
Thaçi, tashmë thotë se transformimi i FSK-së në Forcat e Armatosura “duhet të jetë një proces gjithëpërfshirës vendor dhe i partneritetit të gjithëmbarshëm ndërkombëtar, në veçanti SHBA-së dhe NATO-s”.
Ai paralajmëron se do ta nisë dhe udhëheqë një proces të diskutimeve me përfaqësuesit politikë të serbëve të Kosovës “për të shteruar të gjitha mundësitë e koordinimit me ta për krijimin e ushtrisë.
Në një intervistë dhënë për Radion “Evropa e Lirë”, Thaçi shprehet se asgjë “nuk mund ta bllokojë themelimin e Forcave të Armatosura të Kosovës”, meqë siç thotë “është një e drejtë e patjetërsueshme e qytetarëve të Kosovës dhe e institucioneve të një vendi të pavarur dhe sovran”. /tesheshi.com/
