Kryetari i PDK-së, Hashim Thaçi, deklaroi se është gati për ta marrë edhe postin e presidentit të vendit. Si mysafir në emisionin Zona B të Klan Kosovës, ai mohoi se është lodhur nga politika.
“Nuk jam fare i lodhur. Përkundrazi jam në formën ma të mirë të mundshme – edhe njerëzore edhe djaloshare edhe politike”, ka thënë Thaçi.
Kreu i PDK e ka pranuar se pret të bëhet president pas një viti. Madje thotë se kjo është arsyeja kryesore pse ai hoqi dorë nga posti i kryeministrit.
“Besimi i qytetarëve si njeriu më i votuar prej tetë vitesh dhe fitorja e tri zgjedhjeve nacionale me jep fuqi dhe energji për të vazhduar edhe më fuqishëm në të ardhmen”, tha zv.kryeministri, njëkohësisht shef i diplomacisë.
Thaçi siguroi se do t’i futet kësaj gare, me bindje se do ta fitojë postin, pavarësisht formës së garës që i duhet të nënshtrohet dhe marrëveshjes politike që bëri më LDK-në për këtë punë.
“Në të ardhmen do vazhdojë të jem në krye të obligimeve që më takojnë”, thotë ai. Kryetari i PDK-së la të kuptohet që presidenti i ri i shtetit do të zgjidhet në një mënyrë ndryshe, e jo nga Kuvendi, si deri tani.
“Kjo është edhe një reformë për vendin. Mendoj se diçka e tillë i ka munguar vendit”, thotë Thaçi.
