Ndryshe nga Rama në Shqipëri, Thaçi në Kosovë nuk ka guxuar ta shpotis apo etiketojë median e vendit të tij. Përkundrazi. Ai e ka vlerësuar atë si të guximshme e kurajoze.
Dhe ja si erdhi llafi deri aty.
Presioni dhe sulmet ndaj gazetarëve në Kosovë janë evidente. Kështu u tha sot në konferencën mbi sigurinë e gazetarëve të organizuar nga Misioni i OSBE-së në Kosovë.
Shefi i OSBE-së, Jan Braathu, tha se misioni i tyre ka numëruar 50 raste të sulmeve ndaj gazetarëve, sidomos si përpjekje për të ushtruar presion te transmetuesi publik.
“Misioni i OSBE-së ka kërkuar hetimin e rasteve të sulmeve ndaj gazetarëve, duke kërkuar një rol aktiv jo vetëm të organeve të ndjekjes penale, por edhe nga vet gazetarët”, tha ai.
Në debat ka marrë pjesë me një fjalim edhe presidenti Hashim Thaçi, i cili tha se gazetaria në Kosovë ndoshta nuk është më e vjetra për nga tradita, por është ndër më të guximshmet në rajon.
“Gazetarët në Kosovë kanë qenë ndër të parët që janë angazhuar për pluralizëm, për demokraci, për barazi, për të drejta të njeriut dhe për liri të shprehjes. Ndërkaq, që nga përfundimi i luftës, në Kosovë janë bërë përpjekje të mëdha që të instalohet një gazetari profesionale, e besueshme dhe gjithmonë në shërbim të publikut”, u shpreh presidenti Thaçi.
Kurse, drejtori i RTK-së, Mentor Shala ka dhënë disa kritika në drejtim të Lëvizjes Vetëvendosje, pasi këtë të fundit e vlerësoi si subjekt i cili disa raste ka synim dhunën.
“Fatkeqësisht kemi subjekte që bëjnë thirrje për likuidim. Prokuroria nuk merret me këto raste. Janë bërë 6 muaj me bomba në RTK dhe shtëpinë time dhe s’ka ende zbulim të rastit. Fatkeqësisht në këso situatash janë edhe disa kolegë gazetarë të cilët kanë dal në krah të këtyre sulmeve“, ka thënë ai. /tesheshi.com/
