Nga Blendi Gashi
Presidenti Thaçi, në prag të takimit të Këshillit Veriatlantik të NATO-s, i ka dërguar një letër sekretarit të përgjithshëm të NATO-s, Jens Stoltenberg, dhe shteteve anëtare të Aleancës.
Kjo letër vjen pak ditë pasi që Thaçi doli haptaz kundër Stoltenberg rreth krijimit të ushtrisë duke thënë se iniciativa e tij nuk ka kthim mbrapa.
Në takimin në fjalë pritet të flitet edhe për iniciimin e plotësim-ndryshimit të ligjit për FSK-në.
Thaçi në letrën e dërguar Stoltenbergut dhe përfaqësuesve të shteteve anëtare të NATO-s ua shpjegon tërë procesin e transformimit të FSK-së, duke u munduar që t’ua kthejë mendjen atyre dhe të mbështesin idenë e tij.
Thaçi përmes letrës si president dhe Komandant Suprem i FSK-së, thotë se ndjen obligim për të ofruar të gjitha argumentet e nevojshme ligjore dhe politike në favor të këtij procesi të transformimit, për të shmangur çfarëdo keqkuptimi te NATO dhe anëtarët e saj.
Thaçi në letër e pranon se opcsioni më i mirë për themelimin e ushtrisë do ishte me ndryshime kushtetuese, por thotë se për një gjë të tillë duhen dhe votat e deputetëve serbë të Kosovës të cilët dirigjohen nga Beogradi dhe kanë bërë të qartë se nuk e votojnë ushtrinë.
Më tej, Thaçi i shkruan sekretarit të NATO-s se është i gëzuar me faktin se askush nga partnerët tanë strategjikë, përfshirë edhe NATO-n, nuk e vë në pikëpyetje të drejtën sovrane për themelimin e ushtrisë por dallimi i vetëm mbetet qasja apo opcioni i zgjedhur për ta arritur këtë.
Thaçi i shqetësuar me pasojat e paralajmëruara të NATO-s për FSK-në
Thaçi përmes letrës shihet se është tejet i shqetësuar me paralajmërimin e NATO-s se nuk do e përkrahin FSK-në nëse merret vendim pa serbët.
Presidenti i kërkon miqësisht Stoltenbergut që të merren në konsideratë të gjitha argumentet ligjore dhe politike të shpjeguara në letër dhe t’i ndajë ato me shtetet anëtare të NATO-s, ndërkohë që këmbëngul se transformimi i FSK-së nuk mund të shihet në asnjë mënyrë si një akt i njëanshëm.
“Shpreh keqardhje që në cilësinë tuaj si Sekretar i Përgjithshëm i NATO-s ju keni paralajmëruar pasoja të mundshme në kuptim të bashkëpunimit në mes FSK-së dhe NATO-s në rast të ndryshimit të mandatit të FSK-së. Unë e kam marrë këtë paralajmërim shumë seriozisht dhe më vjen keq shumë që ju i keni bërë publike këto pasoja menjëherë pas ndërmarrjes së nismës ligjore. Duke pasur parasysh respektin më të madh për NATO-n dhe shtetet anëtarë të saj, më duhet të theksoj se Kosova është e vendosur për të përfunduar këtë proces në një mënyrë transparente dhe gjithëpërfshirëse”, deklaron Thaçi.
Thaçi i bën thirrje shteteve anëtare të NATO-s që të mos bëjnë përpjekje me pasoja të mundshme për FSK-së si rezultat i këtij transformimi gradual.
“Në vend të kësaj, bëj thirrje për të gjithë ju për ta mbështetur këtë proces dhe për të forcuar bashkëpunimin me FSK-në, sepse ne kemi ndërtuar këtë forcë të sigurisë bashkërisht për kaq shumë vite”, thuhet në letër.
Si do i përgjigjet NATO?
Kjo letër e dërguar nga Thaçi tregon më së miri shqetësimin e tij për kundërshtimin e NATO-s lidhur me iniciativën e ndërmarrë për ushtrinë.
Presidenti shihet qartë se i bën lutje shteteve të Aleancës Veriatlantike të japin dritën jeshile për iniciativën e tij, pasi është i vetëdijshëm se pa përkrahje të NATO-s ushtria do jetë veç në letër.
Në të njëjtën kohë e lë të hapur “opsionin 1” që nëse ndërkombëtarët ndikojnë tek Serbia që deputetët e Listë Serbe të votojnë për ushtrinë, të tërhiqet menjëherë nga iniciativa e tij.
Thaçit pas letrës së dërguar i mbetet të presë dhe një vendim të ri të NATO-s me shpresën se do e mirëkuptojnë dhe në fund do e mbështesin, nëse jo, presidenti Thaçi mbetet i vendosur në çuarjen në fund të iniciativës së tij, pra themelimin e ushtrisë përmes ndryshimit të ligjit për FSK-në. /tesheshi.com/
