Presidenti Hashim Thaçi ka kujtuar sot aksionin e policisë në veri të Kosovës, ku gjashtë vjet më parë Njësia Speciale (ROSU) kishte ndërmarrë aksionin për t’i futur nën kontroll pikat kufitare në veri të Kosovës, Jarinjë dhe Bërnjak.
Thaçi kujtoi edhe siç tha heroin e pavarësisë, Enver Zymberi.
“Në çdo 25 korrik e kujtojmë me krenari heroin e pavarësisë, Enver Zymberin. Ai ra heroikisht në krye të detyrës, duke mbrojtur kushtetutshmërinë dhe sovranitetin e shtetit tonë. Njësitë speciale të Policisë së Kosovës morën nën kontroll pikat kufitare 1 dhe 31 dhe kjo ishte edhe Dita e Bashkimit të Kosovës. Enveri do të kujtohet gjithmonë për guximin e dëshmuar në mbrojtjen e Republikës së Kosovës”, ka shkruar Thaçi në Facebook.
Kujtojmë se ROSU, hasi në pengesat e serbëve në veri, ku u ballafaqua nga strukturat ilegale serbe me ç’rast u vra polici Enver Zymberi.
Ish presidentja Atifete Jahjaga i ka dhënë titullin “Hero i Kosovës”, Enver Zymberit, me motivacionin “për trimërinë dhe përkushtimin e treguar deri në flijim për vendosjen e sundimit të ligjit në tërë territorin e Republikës së Kosovës”. /tesheshi.com/
