Presidenti Thaçi tha se në dialogun me Serbinë do jetë “krah për krah” kryeministrit Hoti, duke zgjedhur të garojë vetëm me Serbinë.
“Ne e kemi Kushtetutën ku janë të përcaktuara përgjegjësitë institucionale të bartësve të institucioneve. Me rëndësi është që ekziston vullneti shumë i mirë për koordinim. Do të jemi krah për krah me njëri-tjetrin dhe natyrisht që do të punojmë me gjithë lidershipin e Kosovës, derisa në fund gjithçka do të vendoset në Kuvendin e Kosovës. Ne nuk jemi në garë me njëri-tjetrin. Ne do të ulemi bashkë përballë Serbisë dhe gara jonë është me Serbinë”, tha Thaçi, ku ndërkohë, në prag të vizitës së të dërguarit të BE-së Lajçak në Prishtinë, e injoroi këtë të fundit nga kjo fjali:
“Uroj që ky proces të jetë dinamik, i shpejtë, i saktë dhe i suksesshëm nga ana e ambasadorit Richard Grenell”.
Kujtojmë së Thaçi ka premtuar se nuk do e takojë Lajçak, gjersa vendi i tij nuk e njeh Kosovën. 
Nga ana tjetër, sa i përket dialogut, edhe Hoti tha se mes tij e Thaçit nuk do ketë garë për “të parin” e dialogut. “Kushtetuta është e qartë në këtë drejtim, kompetencat edhe të presidentit dhe të mia edhe të institucioneve tjera, janë më se të qarta. Aktvendimi i Kushtetueses i vitit të kaluar është mjaft i qartë. I kemi rolet e ndara po është me rëndësi që në këtë proces të jemi të koordinuar”,theksoi shefi i qeverisë së Kosovës. /tesheshi.com/
