Presidenti Hashim Thaçi, në një debat të organizuar nga Lëvizja Fol, haptas ka kërkuar nga partnerët e koalicionit që ta dërgojnë në Kuvend marrëveshjen për Demarkacionin me Malin e Zi, duke thënë se nuk duhet të fshihen pas arsyetimit se opozita nuk po do të votojë.
Sipas tij, nëse marrëveshja në fjalë nuk kalon, Kosova nuk do të ketë viza për disa vite.
“Demarkacioni duhet të kalojë dhe më nuk mund të fshihen pas asaj se opozita nuk po voton, pasi partnerët kanë e koalicionit i kanë votat, 80 sosh dhe kjo duhet të ndodhë. Qeveria duhet të lëvizë, partnerët e kanë obligim këtë gjë për hir të liberalizimit”, ka deklaruar Thaçi.
Presidenti ka folur edhe për ushtrinë, duke thënë se do të punohet për të bindur të gjithë. Ai nuk ka mundur të japë një dead-line se kur mund të jetësohet ushtria, por ka shtuar se Kosova e ka të pamundur anëtarësimin në NATO pa ushtri.
“Institucionet e Kosovës, partitë politike dhe shoqëria civile janë të gatshme për të bërë hapin për themelimin e ushtrisë. Institucionet janë të vetdijësume për ruajtjen e partneritetit me NATO-n dhe SHBA- në. Si president i vendit e kam për obligim që së bashku të themelojmë ushtrinë dhe të ruajmë bashkëpunimin me partnerët strategjikë. Dallimi i vetëm me partnerët tanë është vetëm qasja. Ata kërkojnë qe ushtria të bëhet me ndryshime kushtetuese. Nuk ka konfrontim me ndërkombëtarët. Kosova duhet ta ketë ushtrinë. Askush nuk mund të vejë veto për ushtrinë. Së fundi edhe SHBA dhe NATO kanë konfirmuar gatishmërine e tyre të ndihmojnë institucionet për të siguruar mbeshtetjen e serbëve për të themeluar ushtrinë me ndryshime kushtetuese. E çmoj këtë angazhim”, ka deklaruar kreu i shtetit kosovar. /tesheshi.com/
