Katër muaj pas vdekjes së Astrit Deharit në burgun e Prizrenit, ka vdekur dje edhe shoku i tij i dhomës, i burgosuri Naser Makolli, i cili së fundmi u transferua në burgun e Lipjanit.
Shërbimi Korrektues i Kosovës që njoftoi për vdekjen e tij, krejt çfarë ka thënë është se “Makolli ka vdekur në emergjencë dhe nuk ka mbijetuar dot as pas reaminicionit”, por nuk ka sqaruar më imtësisht shkaqet dhe rrethanat se si ndërroi jetë Makolli që ishte dëshmitari kryesor në rastin Dehari.
Ministria e Shëndetësisë, përmes një deklarate për media ka përshkruar gjendjen shëndetësore të Makollit, që nga koha kur i ndjeri është transferuar në qendrën e paraburgimit në Lipjan.
“I burgosuri ka qenë duke u mbajtur në Qendrën e Paraburgimit në Lipjan që nga data 09.12.2016. Gjatë kësaj kohe ka qenë nën trajtim të vazhdueshëm mjekësor bazuar në indikacionet mjekësore”, thuhet në deklaratë.
Për vdekjen e Makollit janë ngritur dyshime të mëdha sidomos nga zyrtarë të Vetëvendosje-s të cilët pothuajse njëzëri kanë shtruar pyetjen; ç’po ndodh?
Kujtojmë se Makolli kishte folur për Deharin pas vdekjes së tij, me ç’rast pati thënë se Dehari ka qenë i sjellshëm dhe i shoqërueshëm.
Kishte thënë po ashtu se ditën kritike kur kishte vdekur, kishte shëtitur bashkë me të. /tesheshi.com/
