Mbahet si zemra e shqiptarisë në Maqedoni, lagjia Reçicë të Vogël e Tetovës, aty ku ndodhet dhe selia e BDI-së; por që kjo nuk i ka penguar maqedonas e serbë që të ngrejnë aty, në një shtëpi të lagjes, laboratorin më të madh në Evropën juglindore për prodhimin e drogave sintetike.
Në aksionin e përbashkët të autoriteteve të Rendit në Maqedoni, ku kanë marrë pjesë dhe një ekip hetues nga Serbia, si dhe me përkrahjen e DEA-s amerikane, janë konfiskuar 125 kilogram, përkatësisht 500 mijë tableta ekstazi, në vlerë mbi 2,5 milion euro, si dhe lënda e parë për prodhim. Droga ishte e planifikuar të dërgohej në tregun e Turqisë. Për tregtinë e palejuar, prodhim dhe shitje të drogës janë arrestuar 6 persona nga Maqedonia dhe Serbia.
“Janë kryer bastisje në dy lokacione në Tetovë dhe pesë lokacione në Shkup. Laboratori është zbuluar në Tetovë. Është zbuluar sasia më e madhe e drogës sintetike deri më tani në hapësirat e Ballkanit, dhe në qoftë se vërtetohen vlerësimet fillestare, kjo do të jetë edhe njëri nga konfiskimet më të mëdha në kornizat ndërkombëtare”, u shpreh Oliver Spasovski, Ministër i Punëve të Brendshme.
Sipas burimeve policore të Serbisë, aksioni ka zgjatur një vit, ndërsa në mesin e të arrestuarve është edhe Milan Zarubica, njëri nga prodhuesit më të mëdhenj të drogave sintetike. Policia me vëmendje ka ndjekur edhe bashkëpunëtorët e tij si dhe transporti i mjeteve për prodhimin e drogës nga Serbia deri në Maqedoni dhe anasjelltas. Sipas Informatave të MPB-së së Serbisë, bëhet fjalë për një drogë të re sintetike të cilën e kanë konsumuar edhe luftëtarët e ISIS-it.
Prokuroria për Ndjekjen e Krimit të Organizuar dhe Korrupsionit e Maqedonisë, ka hapur hetim kundër dy shtetasve serbë dhe pesë shtetasve maqedonas, të dyshuar për posedodimin e laboratorit. Për 7 personat, Prokuroria ka kërkuar që gjykatësi i procedurës paraprake t’u shqiptojë masë paraburgimi prej 30 ditëve.
Përpos zbulimit të laboratorit për prodhim të drogës në Reçicë të Vogël, në afërsi të Shkupit, në fshatin Batincë është zbuluar depo e angazhuar nga i njëjti grup, në të cilën kanë ruajtur substancat kimike dhe materialet e tjera të nevojshme për përgatitjen dhe prodhimin e drogës. /tesheshi.com/
