Ministria e Shëndetësisë duket se është bindur së fundmi se testimi i mjekeve dhe infermierëve sipas kushteve të vendosura me kokëfortësi prej saj nuk është një ide e mirë.
Burime nga Qendra Spitalore Universitare “Nënë Tereza” (QSUT) konfirmojnë se Ministria e Shëndetësisë është tërhequr nga kryerja e testimit të mjekëve dhe infermierëve, por po përpiqet të gjejë një rrugëdalje me sa më pak kosto politike pas bujës së madhe që bëri sipërmarrja për kalimin në testim të stafit mjekësor të spitaleve të vendit.
Ka pak gjasa që të ketë qenë pakënaqësia e mjekëve dhe infermierëve për mënyrën denigruese që ministria po sillej me ta që ta ketë stepur ministrin Beqja nga sipërmarrja personale e tij. Më shumë se kjo, duket se është kundërshtimi publik që aleati i PS-së në qeverisje, LSI-ja i bëri këtij testimi. Madje, vendimi për t’u tërhequr nga testimi thuhet të jetë marrë pikërisht pas deklarimit të ditës së enjte të ish-ministrit të Shëndetësisë Petrit Vasili, i cili i bëri edhe një apel të fortë Beqjes për të mos u sjellë me kokfortësi ndaj mjekëve, transmeton Albeu.com.
Tërheqja vjen edhe pak muaj para zgjedhjeve lokale, ku me sa duket qeverisë nuk i kanë dalë mirë llogaritë me prishjen e qejfit të një personeli prej 30 mijë vetash që janë të angazhuar në shëndetësi, aq më tepër kur përballë është edhe LSI-ja.
