Model 3 është makina më e re elektrike e kompanisë Tesla, e cila u zbulua ditën e djeshme. Me një çmim bazë prej 35.000 dollarësh, me këtë model kërkohet hyrja në tregun masiv të shitjes së automjeteve.
Çmimi i kësaj makine është sa gjysma e dy modeleve të shitura deri tani: Model S dhe Model X kanë patur si çmim fillestar shifrën 70.000 dollarë.
Edhe pse modeli i ri do të dalë në treg një vit më pas, numri i porosive në 24 orët e shkuara ka arritur në 115.000.
Sipas themeluesit të kompanisë, Elon Musk, ky model i ri është hapi përfundimtar i planit të përgjithshëm, që ka si objektiv tregun masiv, e një makinë të mundshme për t’u blerë.
Modeli 3 do të jetë në gjendje të përshkojë një distancë prej 346 kilometrash me një bateri të ngarkuar plotësisht, e të mbajë rehatshëm pesë persona të rritur në të. Veç kësaj, elementët e veçantë të sigurisë janë të disponueshëm pa një çmim shtesë. /tesheshi.com/
