Turqia nuk e pranon mesazhin ngushëllues amerikan në lidhje me sulmin më të fundit terrorist në Stamboll, tha të hënën ministri i Brendshëm i vendit, Suleyman Soylu.
Soylu tha se Turqia do të dijë si t’i përgjigjet sulmit në Stamboll.
“Ne e dimë se çfarë mesazhi duan të na përcjellin ata që e kryejnë këtë aksion. Përgjigja për këtë mesazh do të shfaqet shumë qartë”, tha Soylu, duke dënuar Shtetet e Bashkuara për financimin e terroristëve të PKK.
“Pasinqeriteti i të ashtuquajturve tanë aleatët, sidomos ata që na duken miqësorë, të cilët ose fshehin terroristët ose u japin mundësinë të veprojnë në zonat që ata pushtojnë dhe u dërgojnë para nga senati, është më se e dukshme”, përfundoi Soylu.
Në shpërthimin në rrugën Istiklal në Taksim, pas së cilit raportohet se qëndron organizata terroriste PKK/YPG, 6 persona mbetën të vdekur dhe 81 të plagosur.
Autorja e arrestuar ka pranuar se urdhërin për sulmin e ka marrë nga qendra e organizatës terroriste në Kobani të Sirisë. YPG është dega siriane e PKK-së, e cila renditet si organizatë terroriste nga Turqia, SHBA dhe Bashkimi Evropian.
Sekretarja e shtypit e Shtëpisë së Bardhë, Karine Jean-Pierre, në një deklaratë me shkrim të lëshuar të dielën, tha: “Shtetet e Bashkuara dënojnë me forcë aktin e dhunës që ndodhi sot në Stamboll”.
Duke folur për gazetarët në vendin e shpërthimit, ministri i Brendshëm Soylu tha sot se personi përgjegjës për sulmin do të kishte ikur në Greqi nëse nuk do të kapej. /tesheshi.com/
