Mesdita e sotme ka rezultuar fatale për rajonin administrativ të Suruçit në Shanllëurfa. Një shpërthim në lulishten para qendrës kulturore Amara ka lënë të vdekur 28 persona, si dhe më tepër se 100 të plagosur.
Shkaku i shpërthimit nuk është ende i qartë, por mendohet se gjithçka ka qenë e menduar, e sulmi të jetë një shpërthim vetëvrasës. Dyshohet se personi që ka hedhur veten në erë ka qenë një vajzë 18-vjeçare.
Askush nuk e ka marrë përgjegjësinë për sulmin, ndërsa policia lokale ka nisur menjëherë hetimet.
Raportimet e fundit nga terreni sugjerojnë se sulmi kishte si synim 300 të rinj të Federatës së Shoqatave të Rinisë Socialiste (SGDF), të cilët qenë mbledhur në qendrën kulturore përpara se të udhëtonin për në Kobani, në qytetin kurd të Sirisë në krahun tjetër të kufirit.
Grupi i të rinjve do të shkonte në Kobani për të ndihmuar në rindërtimin e qytetit.
Ministri i Punëve të Brendshme ka lëshuar një deklaratë, ku shpreh frikën se numri i të vdekurve mund të rritet me kalimin e orëve.
Ky rajon ka qenë prej kohësh i trazuar, që kur Kobani u bë qendër e luftimeve mes ISIS-it dhe luftëtarëve kurdë, e shpesh është vënë në qendër të diskutimeve ndërsa ka një debat për rolin dhe synimet e kurdëve në përfshirjen e tyre në luftimet në Siri. /tesheshi.com/
