Shtetet e Bashkuara janë të gatshme të ofrojnë “çdo lloj ndihme të nevojshme” pas një tërmeti të fuqishëm me magnitudë 7.7 ballë që goditi Turqinë juglindore herët të hënën, duke shkaktuar shumë viktima.
Tërmeti, me qendër në provincën jugore të Kahramanmaras, u ndje në nëntë provinca të tjera, si dhe në vendet fqinje, duke përfshirë Sirinë dhe Libanin.
Në Turqi, Autoriteti i Menaxhimit të Fatkeqësive dhe Emergjencave (AFAD) ka konfirmuar deri më tani 1,014 vdekje, me të paktën 5,385 persona të plagosur.
“Shtetet e Bashkuara janë thellësisht të shqetësuara nga raportet e tërmetit shkatërrues të sotëm në Turqi dhe Siri,” tha në një deklaratë këshilltari amerikan për sigurinë kombëtare, Jake Sullivan.
“Ne jemi të gatshëm të ofrojmë çdo dhe të gjithë ndihmën e nevojshme,” tha ai, duke shtuar se presidenti Joe Biden ka drejtuar USAID-in dhe partnerët e tjerë të qeverisë federale të “vlerësojnë opsionet e reagimit të SHBA për të ndihmuar ata që janë më të prekurit”.
“Ne do të vazhdojmë të monitorojmë nga afër situatën në koordinim me qeverinë e Turqisë,” tha Sullivan.
Ministri i Brendshëm turk, Suleyman Soylu tha se ekipe të shumta janë të angazhuara në punën e kërkim-shpëtimit, duke shtuar se vendi ka lëshuar një alarm të Nivelit 4, i cili përfshin një thirrje për ndihmë ndërkombëtare. /Tesheshi.com/
