Pasgoditjet po pengojnë përpjekjet e kërkim-shpëtimit në Marok, i cili u godit nga një tërmet me magnitudë 7 ballë të shtunën.
Një numër i madh njerëzish janë ende nën rrënoja. Vazhduajnë dhe operacionet e kërkim-shpëtimit.
Por të mbijetuarit nuk mund të jenë të lumtur që u shpëtuan sepse humbën anëtarët e familjes, të afërmit, miqtë…
Mijëra njerëz vdiqën dhe mijëra u plagosën në tërmetin, epiqendra e të cilit ishte rajoni Al-Huz i Marrakeshit.
Tërmeti është ndjerë edhe në kryeqytetin Rabat, si dhe në qytetet Kazablanca, Meknes, Agadir dhe Fes.
Ndërsa disa ndërtesa historike u dëmtuan në qytetet metropolitane, nuk pati asnjë shkatërrim në ndërtesat e betonit të armuar.
Në zonën e Amizmizit, ku lagjet e vjetra u dëmtuan rëndë, po vijojnë operacionet e kërkim-shpëtimit, por po ofrohet ndihmë edhe për viktimat e tërmetit.
Një gazetar i Anadolia-s ka vizituar të plagosurit në spitalin fushor ushtarak në Amizmiz.
Ibrahim Vaali, i cili ka pësuar lëndime në pjesë të ndryshme të kokës dhe trupit, tha se gjithçka u përmbys në tre sekonda.
“U deshën tre sekonda që gjithçka të kthehej përmbys. Unë mbijetova sepse vendi ku isha kishte një çati prej kallami. Gjithçka rreth meje ishte e mbuluar me dhe. Kur u ngrita, pashë bashkëshorten dhe vajzwn katër muajshe. Dëgjova të qara. Me forcat tona dolëm me gruan dhe vajzën time nga rrënojat. Me ne ishte edhe gjyshja. E nxorëm edhe atë por e çuan në spital”, tha Vaali.
Ai ka thënë se vendbanimi ku ata jetojnë në Amizmiz është i vjetër dhe se shtëpitë janë kryesisht prej balte.
“Nëna dhe babai im jetojnë me vëllezërit dhe motrat e mia në shtëpinë pranë nesh. Ata gjithashtu ishin të bllokuar nën shtëpinë e tyre prej dheu. Ne u përpoqëm t’i nxjerrim jashtë rreth një orë pas tërmetit, por u vonuam shumë. Ata vdiqën. Gruaja dhe vajza u shpëtuan, por ne nuk jemi të lumtur. Humbëm të dashurit tanë në tërmet”, tha Vaali.
Shumë vullnetarë erdhën në Amizmiz nga qytetet fqinje për të ndihmuar në operacionet e kërkim-shpëtimit, si dhe të mbijetuarit.
Abdurrahim Bezag, një nga të rinjtë vullnetarë që erdhi në ndihmë nga Marrakesh, tha se operacionet e kërkim-shpëtimit po zhvillohen në kushte shumë të vështira.
“Dëgjuam se shumë njerëz ishin të bllokuar nën rrënoja, kështu që erdhëm këtu. Arritëm t’i nxjerrim disa prej tyre nga nën rrënoja. Tre tërmete të vogla kanë ndodhur gjatë punës në rrënoja. Ata na e vështirësojnë punën edhe më shumë”, tha Bezag.
Ai deklaroi se ata shpëtuan shumë njerëz në zonën e Sidi Hussein.
“Ambulancat nuk mund të kalonin sepse rrugët janë të ngushta, ndaj na u desh të mbanim në krahë të plagosurit. Këtu ndodhi një tragjedi e madhe, disa mbetën pa fëmijë, në disa vende u dhuan familje të tëra”, shtoi Bezag.
Të paktën 2,122 njerëz u vranë dhe 2,421 u plagosën në një tërmet të fuqishëm që goditi Marokun, tha të dielën Ministria e Brendshme. Nga të plagosurit, 1404 persona janë në gjendje kritike.
Vdekje u raportuan në disa rajone, duke përfshirë El-Houz, Taroudant, Chichaoua, Tiznit, Marrakech, Azilal, Agadir, Casablanca dhe Youssoufia.
Mbreti Mohammed VI i Marokut, pas tërmetit që goditi vendin, shpalli tre ditë zie kombëtare gjatë së cilës flamujt në ndërtesat publike do të jenë në gjysmështizë.
Krahas kësaj, Mbreti ngarkoi qeverinë të formonte një komitet ministror për programin e rindërtimit të shtëpive të shkatërruara nga tërmeti.
Ky është tërmeti më i fortë që ka goditur këtë vend të Afrikës Veriore në njëqind vitet e fundit, tha Instituti Kombëtar i Gjeofizikës i Marokut.
Tërmeti është ndjerë në Algjerinë dhe Mauritaninë fqinje. /tesheshi.com/
