Mali i Zi rrezikohet nga tërmetet. Martin Cavelis i Institutit Hidrometeorologjik dhe Sizmologjik nuk e mohon mundësinë që një tërmet shkatërrues të prekë edhe këtë vend, por siç thotë ai është shumë e vështirë të dihet se kur do të ndodhë tërmeti, sot apo mbas 100 viteve.
Reagimi vjen në një kohë kur janë bërë paralajmërime që tërmete 6.6 të shkallës Rihter të prekin Serbinë.
“Ekziston mundësia që tërmeti të na godasë në 100 vitet e ardhshme, por kjo nuk do të thotë që tërmeti ndodh sot. Më duhet ta theksoj se kur po them do të ndodh 100 vitet e ardhshme, kjo mund të ndodh edhe tani, pra nuk dimë datë të saktë”, ka thënë Cavelis dhe ka shpjeguar se asnjë shërbim sizmologjik nuk po jep parashikime që dëshmojnë se do të goditen nga tërmeti, shkruan gazetametro.
“Ne bëjmë parashikime për 100 deri në 150 vjet e shohim se sa të fuqishëm mund të jenë tërmetet dhe në bazë të kësaj në e bëjmë edhe hartën dhe në bazë të kësaj në mund të themi për shembull, në Mal të Zi në këtë pjesë ku dikush dëshiron të ndërtojë ndërtesë, i thuhet që mund në 50 vitet e ardhshme të goditet nga tërmetet”, thotë ai.
Në pyetjen se kur Malin e Zi do ta godasë tërmeti, a do të shkaktonte cunami në bregdet, Cavelis ka shpjeguar se cunami i shkaktuar nga tërmeti në këtë vend është i pamundur, por që një valë më e madhe nga Mesdheu mund të godasë Malin e Zi .
“Cunami në Mal të Zi, më saktë në Adriatik është i pamundur. Ekziston mundësia që të vijë ndonjë valë më e madhe nga Mesdheu, por për shkak të shkëmbinjve apo thellësisë të detit praktikisht është e pamundur. Mund të vij ndonjë vale prej 20-30 centimetrave dhe të vërshojë në plazh, po cunami serioz është i pamundur”, shprehet Cavelis. /tesheshi.com/
