Prodhuesi prestigjoz gjerman i automjeteve planifikon të mbyllë të paktën tre fabrika dhe të shkurtojë dhjetëra mijëra vende pune në vend, sipas një këshilli të punës të Volkswagen në Gjermani.
“Bordi drejtues i Volkswagen (VW) planifikon të mbyllë të paktën tre fabrika në Gjermani”, tha presidentja e këshillit të punës të kompanisë, Daniela Kavalo, në një takim informues me punonjësit në Wolfsburg. Ajo shtoi se të gjitha fabrikat e mbetura do të duhet të zvogëlojnë kapacitetet e tyre. Menaxhmenti i kompanisë tani ka njoftuar përfaqësuesit e punonjësve për këto plane.
Sipas këshillit të punëtorëve, fabrika në Osnabrück është veçanërisht në rrezik, pasi sapo ka humbur një kontratë të re të pritshme me Porsche. Kavalo shtoi se administrata po planifikon pushime masive nga puna: sipas vlerësimeve të këshillit të punëtorëve, dhjetëra mijëra vende pune janë në rrezik. Sektorë të tërë mund të mbyllen ose të zhvendosen jashtë vendit.
“Të gjitha fabrikat e Volkswagen në Gjermani preken nga këto plane. Asnjë nuk është e sigurt,” tha Kavalo, pa dhënë detaje.
Volkswagen punëson rreth 120,000 punëtorë në Gjermani, gjysma e të cilëve janë në Wolfsburg. VW ka gjithsej dhjetë fabrika në Gjermani, nga të cilat gjashtë janë në Saksoninë e Ulët, tre në Saksoni dhe një në Hessen. Në shtator, VW ndërpreu marrëveshjen e sigurisë së punës, e cila kishte më shumë se 30 vjet. Kështu, duke nisur nga mesi i vitit 2025, është i mundur shkarkimi i punëtorëve për të ashtuquajturat “arsye biznesi”.
Ulje pagash me 10 për qind
Menaxhmenti i Volkswagen dhe sindikata IG Metal do të takohen të mërkurën për raundin e dytë të negociatave për marrëveshjen kolektive. Qysh në raundin e parë në shtator, VW hodhi poshtë kërkesat e IG Metal për një rritje të pagave shtatë për qind, duke këmbëngulur për kursime, por nuk dha informacion të saktë për këtë.
Sipas Kavalo, VW tani po kërkon një ulje të pagave dhjetë për qind dhe një ngrirje të pagave për dy vitet e ardhshme. VW njoftoi në fillim të shtatorit se nuk përjashton më mbylljen e fabrikave dhe pushimin nga puna të punëtorëve, shkruan DW. /tesheshi.com/
