Komisioni Qendror i Zgjedhjeve ka çregjistruar kandidatin e Partisë Demokratike për kryebashkiak në Kurbin. Ilir Pjetraj u çregjistrua, pasi ishte regjistruar jashtë afatit.
Më herët, nga gara për Bashkinë e Kurbinit u tërhoq kandidati tjetër i Partisë Demokratike, Altin Biba. Për Bashkinë e Kurbinit do të kandidojë vetëm kandidati i së majtës.
Pas këtij vendimi reagoi përfaqësuesi i PD-së në KQZ, Njazi Kosovrasti, i cili tha se “do ta ankimojmë vendimin e Komisionit Qendror të Zgjedhjeve”, pasi bëhet fjalë për një vendim të çuditshëm. “Pas dorëheqjes së kandidatit të parë, partia ka të drejtë të sjellë një tjetër. Qytetarëve po u mohohet e drejta e zgjedhjes”, tha Kosovrasti.
Ndërkohë, përfaqësuesi ligjor i PS-së, Genci Gjonçaj, deklaroi: “PD-ja është në të drejtën e saj për ankimimin e vendimit, por unë mendoj se KQZ mori një vendim të drejtë. Procesi nuk mund të mbetet peng nga problemet që kanë partitë me veten e tyre”.
Ambasadori i SHBA në Tiranë dhe ajo e BE i kanë kërkuar PD dhe PS të tërheqin kandidatët me rekorde kriminale. Burime diplomatike bënë të ditur se ndërkombëtarët presin edhe tërheqje përpara datës 22 maj.
