Frank Lampard dhe Steven Gerrard qenë cilësuar si bërthama e të ashquajturit “brez të artë” të Anglisë. I dyti e la futbollin jo shumë kohë më parë, të parit i erdhi momenti tani.
Të dy kanë të përbashkëta të tjera: shkëlqyen si njëri e si tjetri në klubet ku u aktivizuan për vite, por kurrë nuk e patën të njëjtin shkëlqim te kombëtarja e “tre luanëve”. Veç kësaj, Lampard dhe Gerrard i bënë një mbyllje të butë karrierës, duke luajtur në futbollin amerikan, në MLS, Major League Soccer.
Lojtari që fitoi 11 trofe të mëdha me Çelsin, mes të cilëve Premier League-n dhe Champions League-n, do të shkruante kështu sot në një rrjet social: “Ndërsa kam marrë një numër ofertash tërheqëse për të vazhduar të luaj, në moshën 38-vjeçare, e ndiej tani se është koha për të filluar kapitullin e ri në jetën time.”
Një mesfushor i shkëlqyer, Lampard luajti në 649 takime për Çelsin në karrierën e tij, ndërkohë që u shënoi 39 ekipeve të ndryshme në Premier League.
Ja ç’shkruan mes të tjerash Phil McNulty i BBC-së për të: “Statusi legjendar i Frank Lampard-it dhe pozita si një nga lojtarët më të mëdhenj të kohës moderne është çimentuar nga statistikat. Ai ishte model i vazhdimësisë, i admiruar dhe i respektuar njëlloj nga shokët e ekipit dhe kundërshtarët.”
“Çfarë karriere! Faleminderit Frank,” lexohet në faqen e Çelsit në Twitter.
“Lojtari më i madh në historinë e klubit tonë të madh të futbollit. Ishte një kënaqësi absolute të luash me ty…,” janë fjalët e John Terry-t, një mik i ngushtë dhe shok skuadre me Lampard-in.
Në fund, për ta mbyllur, mjaftojnë vetëm tre fjalë të ish-tenistit të madh gjerman Boris Becker: “Një legjendë tërhiqet…” /tesheshi.com/
