19-vjeçari me nacionalitet britanik, Michael Sandford është arrestuar ndërsa po tentonte të vidhte pistoletën e një polici gjatë një eventi elektoral të Donald Trump në Las Vegas. Dyshohet se ai donte të vriste kandidatin republikan për Shtëpinë e Bardhë. “Është mënyra më e thjeshtë për të qëlluar Trumpin”, – ka thënë i riu pasi u blokua nga autoritetet. I riu dyshohet se është i papunë dhe jeton në mënyrë ilegale në SHBA.
Duke iu referuar denoncimit që është paraqitur në zyrën e Prokurorit në Nevada, të shtunën i riu i ishte afruar një polici që ishte në shërbim në Treasure Island Casino në Las Vegas, ku po mbahej një event elektoral në mbështetje të Donald Trump, i kishte vënë atij dorën në fundshpinë dhe kishte arritur t’i merrte armën.
19-vjeçari ka shpjeguar se “ajo ishte mënyra më e thjeshtë për të gjetur një pistoletë për të vrarë Trump”, duke theksuar se “nëse do të ishte i lirë do të ksihte tentuar sërish”.
Avokati i tij mbrojtës ka konfirmuar se i riu është i prekur nga autizmi dhe më herët ka tentuar edhe vetëvrasjen.
Nëse Michael Sandford cilësohet fajtor për “akt dhune në një vend privat” rrezikon mbi 10 vite burg dhe 250 mijë dollarë gjobë. /tesheshi.com/
