Tensionohen zgjedhjet në Itali, ndërsa policia ka ndërhyrë për të parandaluar përplasjet midis protestuesve të esktremit të majtë dhe atyre neo-fashistë në Torino. Gjithçka ka ndodhur mbrëmjen e së enjtes, kur 100 protestues të ekstremit të majtë marshuan kundër një organizimi neo-fashist në qytetin verior të Torinos dhe më pas u përleshën me policinë.
Protestuesit “anti-fashistë” u përpoqën të kalonin kordonin policor për të arritur në mjediset ku partia Casapound po mbante një tubim për kandidatët e saj. Por, demonstruesit hasën në rezistencën e policisë, e cila përdori gaz lotsjellës dhe ujë me presion ndaj tyre.
Dy fraksionet u ballafaquan më pas në distancë, teksa protestuesit hodhën tymuese dhe shishe ndërkohë që mbanin banderola ku lexohej “Torino është anti-fashiste”.
Policia u detyrua të përdorte më shumë gaz lotsjellës, duke u përpjekur të shpërndante demonstruesit. Raportohet se tre oficerë mbetën lehtësisht të plagosur nga përballjet, ndërkohë që janë kryer edhe arrestime.
Kjo përplasje shihet si një shenjë e tensioneve gjithnjë në rritje përpara zgjedhjeve kombëtare të cilat do të mbahen më 4 mars.
Ngjarja më e fundit, që nuk është përplasja e parë në fushatën zgjedhore në Itali, ka rritur shqetësimin për rikthimin e dhunës politike të viteve ’70 dhe ’80. /tesheshi.com/
