Prezent me qëndrimet apo komentet e tij në çdo zhvillim lidhur me Kosovën, kryeministri Rama u shpreh së fundi, ditë pas rishpërthimit të tensioneve në Veri, me aktin e dorëheqjes së serbëve nga institucionet e Kosovës, duke shkruar se mirëkupton edhe Prishtinën edhe aleatët.
“Po e ndjekim me vëmendje të madhe e shqetësim të vërtetë situatën e acaruar në Kosovë dhe bashkohemi me qëndrimet e aleatëve tanë strategjikë SHBA & BE. Ndërkohë që mbështesim plotësisht idenë themelore të Planit Franko-Gjerman bëjmë thirrje për vetëpërmbajtje dhe dialog Kosovë-Serbi”, shprehet Rama, duke vijuar më tej se “autoritetet e Kosovës janë në të drejtën e tyre të kenë rezerva për Asociacionin e Komunave Serbe dhe unë e mirëkuptoj këtë! Por i mirëkuptoj edhe aleatët kur e kërkojnë këtë me ‘forcë’! Prandaj duhet kërkuar një dialog i palodhur me Serbinë për të mos humbur edhe aleatët!”. /tesheshi.com/
