Punimet në rindërtimin e shtëpisë së Hazir Feratit, të djegur gjatë luftës në Kosovë nga forcat ushtarako policore serb janë ndërprerë sot rreth orës 13:30, ka njoftuar përfaqësuesi i lagjes ‘Kroi i Vitakut’, Nazmi Ismaili.
Sipas tij, ndërprerja është bërë pas insistimit të zyrtarëve të Qeverisë së Kosovës në Prishtinë.
Burime të portalit ‘Tesheshi’, kanë bërë të ditur se ndërprerja e punimeve në lagjen ‘Kroi i Vitakut’ ka ardhur pas një telefonate që banorëve të lagjes iu kanë bërë një anëtar i delegacionit të Kosovës që gjendet për bisedime në Bruksel.
“Nga Brukseli, na ka telefonuar Arben Çitaku, U.d i sekretarit permanent të Ministrisë së Mjedisit dhe Planifikimit Hapësinor, me çka ka kërkuar që të ndërpriten punimet”, ka thënë burimi i portalit.
Siç ka thënë ai: “kërkesën e këtij zyrtari që është në bisedime në Bruksel për ndërprerje të punimeve e kemi respektuar me qëllim që të mos shkaktojmë tensioni, por nëse brenda pak ditëve nuk na lejohet ndërtimi ne familjarët do të fillojmë punimet dhe më nuk do t`i ndërpresim”. /tesheshi.com/
