Ditën e nesërme, Inspektorati i Lartë i Deklarimit dhe Kontrollit të Pasurive i dërgon Komisionit të Kualifikimit, që sapo u miratua nga Parlamenti, dosjet e tre krerëve të gjyqësorit shqiptar: Kryetarit të Gjykatës Kushtetuese, Bashkim Dedja; kreut të Gjykatës së Lartë, Xhezair Zaganjori; si dhe Kryeprourorit të Republikës, Adriatik Llalla.
Dosjet që Shkëlqim Ganaj, kreu i ILDKP-së do t’i dërgojë komisionit të vetingut përmbajnë përveç deklarimin e pasurive, edhe hetimin administrativ të kryer brenda tre vjetësh në lidhje me pasurinë e tre krerëve të gjyqësorit shqiptar.
Paralelisht me ILDKP-në, edhe Drejtoria e Informacionit të Klasifikuar pranë Kryeministrisë do dërgojë të dhënat për pastërtinë e figurës.
DISK është një institucion në Kryeministri që administron të gjitha informacionet e shërbimeve sekrete shqiptare që janë SHISH, SHÇB-ja e Policisë dhe SHIU-it.
Ndërkaq, një material të plotë do të dërgojë edhe Grupi Ndërkombëtar i Monitorimit, anëtarët e cilit prej më shumë se 2 vjetësh kanë grumbulluar informacion të detajuar për të gjithë gjyqësorin. Prej aty do të përcillet një relacion për të tre krerët e drejtësisë, së bashku me rekomandimin sipas tyre nëse e meritojnë apo jo të qëndrojnë brenda gjyqësorit.
Në fund vendimi do të jetë i Komisionit të Vettingut, i cili është zgjedhur 50% nga PS dhe 50% nga PD.
Por nëse Komisioni do të anashkalojë rekomandimin e Operacionit Ndërkombëtar të Monitorimit, atëherë do të publikohen menjëherë të gjitha të dhënat.
Gjyqtarët dhe prokurorët plotësuan 3 formularë në fund të 2016, ku deklaruan pasurinë, pastërtinë e figurës, por dhe karrierën e tyre. ONM ka bëjë verifikime jashtë vendit dhe ndërkohë do të monitorojë procesin.
Vetingu ende pa u zbatuar, i ka dhënë efektet në sistemin e drejtësisë. Këshilltarë ligjorë të Gjykatës së Lartë janë larguar për arsye të ndryshme, por më shumë për shkak të vetingut.
Ndërkohë, gjyqtarët Mirela Fana dhe Vladimir Kristo nuk pranuan të bëhen pjesë e vetingut, duke dhënë dorëheqjen sipas arsyetimeve të tyre. Pra, pak para se të mbaronte afati i dorëzimit të formularëve të vetingut, pesë anëtarë të sistemit të drejtësisë i kërkuan Presidentit dorëheqjen e tyre. Surprizë ishte largimi i gjyqtarit kushtetues Vladimir Kristo, i cili paraqiti argument pragun e pensionit, ndërsa gjyqtarja Mirela Fana dha pretendimin se i duhej të thellohej në jetën akademike.
Ngritja e SPAK
Ajo që është më e rëndësishmja është se me zhbllokimin e vetingut i hapet rruga ngritjes së Byrosë Kombëtare të hetimit dhe SPAK. Këto dy institucione në shtator pritet të ngrihen dhe pastaj do nisë goditja e korrupsionit në nivele të larta, ku pritet të ketë dhe arrestime VIP.
Por kush rrezikon? Të parët janë ata që kanë dosje në prokurori. Janë rreth 500-600 zyrtarë me dosje në organin e akuzës. Shumica e kallëzimeve janë bërë nga Kontrolli i Lartë i Shtetit dhe Inspektorati i Lartë i Deklarimit dhe Kontrollit të Pasurive.
Për vitin 2016, KLSH kallëzoi 176 punonjës në institucione të ndryshme, ndërsa ILDKP ka kallëzuar 72 persona. Vetëm për vitin që lamë pas janë 248 persona. Ndërkohë, gjatë viteve 2013, 2014, 2015 KLSH ka kallëzuar rreth 400 zyrtarë, pro që për gjysmën e tyre dosjet kanë mbërritur në gjykatë. Ndërsa ILDKP gjatë 3 viteve të fundit ka kallëzuar rreth 200 zyrtarë, por që dhe për ta gjysmat e kallëzimeve kanë shkuar në gjykatë.
Pra bëhet fjalë për rreth 500 deri në 600 zyrtarë të ndryshëm me dosje, përfshirë këtu emrat e disa pushtetarëve të lartë. /tesheshi.com/
