1 nëntori është një ditë kyçe për turqit, ndërsa ata do të votojnë për herë të dytë brenda gjashtë muajve për qeverinë e tyre të ardhshme. Zgjedhjet e parakohshme qenë zgjidhja e vetme pasi në muajt e shkuar dështuan përpjekjet për të krijuar një qeveri koalicioni.
Kryetari i AKP-së, partisë me më shumë mbështetës në Turqi, e njëkohësisht kryeministër i vendit, Ahmet Davutogllu, ka mbajtur një fjalë dje në Stamboll para mijëra njerëzve. Mitingu i djeshëm ishte pjesë e fushatës zgjedhore, të futur tashmë në javën e fundit të saj.
Davutogllu u zotua në fjalën e tij se operacionet ushtarake kundër PKK-së, organizatës terroriste kurde, do të vazhdojnë derisa të gjitha malet të pastrohen nga terroristët.
Në fjalën e tij pati një hapësirë të veçantë kritika ndaj tre partive të tjera parlamentare, që sipas Davutogllusë, u munduan ta lënë jashtë përpjekjeve për krijimin e një qeverie AKP-në, por nuk ia dolën.
Në premtimet ekonomike të shprehura në miting, Davutogllu përmendi atë për rritjen e rrogës minimale në 1.300 lira, si dhe për mundësinë e ofruar pensionistëve për të blerë shtëpi me një shumë simbolike të paguar për çdo muaj.
Anketimet e fundit kanë sugjeruar një rritje të AKP-së, që mund t’i mundësojnë një fitore të mjaftueshme në zgjedhje për të krijuar e vetme qeverinë. Ata që nuk votuan në zgjedhjet e shkuara, si dhe një pjesë e elektoratit të nacionalistëve, janë mes atyre që po kërkohet të binden për të votuar për partinë e Davutogllusë.
E përballur me një konflikt të rinisur me PKK-në, dhe e gjendur në një rajon të përfshirë nga flakët e luftës, Turqia e ka jetik këtë të dielë një rezultat zgjedhor që do të mundësonte krijimin lehtësisht të një qeverie dhe kthimin e stabilitetit. /tesheshi.com/
