Ata mund t’i quash “të dënuarit e kushtueshëm”, por rrotull tyre po zhvillohet e gjithë merkatoja e gushtit në Europë.
Eshtë fjala për lojtarë që kërkojnë të largohen nga klubet ku luajnë, qoftë për shkak të ofertave të majme të skuadrave që i kërkojnë, qoftë për shkak të hapit cilësor që pretendojnë në karrierë, qoftë edhe për shkak të kontadiktave që kanë në ekipet ku luajnë.
I pari dhe më i bujshmi është barziliani Kutinjo që luan për Liverpulin, i cili është identifikuar si zëvendësuesi ideal i Neymar tek Barcelona.
Klubi britanik nuk kërkon ta shesë yllin e tij, por vetë mesfushori, dëshiron kalimin në Barcelonë. E ndërkohë që agjentët e klubeve, “dorëpërkulin” njëri-tjetrin, mes shifrash, Liverpul e ka përjashtuar Kutinjon nga fotot e stërvitjes verore. Ndërsa vetë 24 vjecari, nuk i ka zhvilluar me skuadrën, stërvitjet e fundit.
“Dënim” nga klubi ka marrë edhe francezi 19-vjeçar Dembele i Borusias së Dordmund. Për dy ditë ai ishte “zhdukur pa lënë gjurmë” dhe klubi nga Ruhri vendosi ta pezullojë, masë të cilën nuk e ka hequr ende. Edhe Dembele është vënë në fokusin e Barcelonës, e cila, duke parë vështirësitë për të arritur tek Kutinjo, ka gjetur tek dribluesi francez, alternativën e sulmit. Edhe Dembele dëshiron kalimin në klubin blaugrana, por sic gjermanët e kanë zakon, asgjë nuk mund të bëhet pa rregull.
Një tjetër sulmues, kësaj rradhe në Itali, ka mbetur jashtë skuadre. Bëhet fjalë për Keita të Lazios, i cili papritur e ka gjetur veten jashtë formacionit në ndeshjen e Superkupës që skuadra nga Roma fitoi ndaj Juventusit të dielën. Keita është shprehur se ka qenë fizikisht gati për ndeshjen, pavarësisht se ka patur kontradikta këto ditë me klubin lacial, pasi është vënë në shënjestrën e disa klubeve, mes të cilëve, Milan dhe Inter janë në avantazh. Përjashtimi i tij nga ndeshja e Superkupës, ka ardhur pas “veto”-s së vënë nga Drejtori i përgjithshëm Igli Tare, i cili nuk i ka pritur mirë kapricot e Keita, në merkaton e verës.
E ndërsa situatat për secilin prej këtyre lojtarëve, nuk janë qartësuar ende, disa klube po qëndrojnë të vëmendshëm për të parë fundin e historisë, për të goditur në momentin “e duhur”, e për të marrë befasisht ndonjë prej këtrye lojtarëve. /tesheshi.com/
