A do të bëhet Kosova me institucione të reja më 3 gusht? Ja ç’mendojnë analistët kosovarë

Nga Blendi Gashi

Kanë mbetur edhe tre ditë për të kuptuar nëse krerët e koalicionit PDK-AAK-NISMA, Kadri Veseli e Ramush Haradinaj do të krijojnë institucionet e reja apo vendi do të rrëshqet drejt një krize si më 2014-tën.

Më 3 gusht të dy këta lider pritet të hyjnë në “provim” për të fituar njëri mandatin e kryetarit të Kuvendit dhe tjetri të kryeministrit. Për të arritur sukses ju duhet të sigurojnë 61 vota, të cilat koalicioni PAN deri më tani nuk e ka dëshmuar se i ka, pasi ende nuk ka zyrtarizuar marrëveshje as me minoritet.

Ndërsa përfaqësues të PAN-it në çdo ditë deklarohen se i kanë numrat dhe institucionet do krijohen, këtë gjë fare se besojnë rivalët e tyre nga Vetëvendosje dhe LDK-AKR e Alterantiva që presin dështimin e Haradinajt duke u shprehur të sigurtë se më pas ata do marrin pushtetin edhe pse presidenti Thaçi pothuajse ka konfirmuar se nuk mandaton parti tjetër për ta formuar qeverinë nëse Haradinaj dështon.

Pavarësisht deklarimeve të përfaqësuesve të PAN-it, analistët kosovarë nuk besojnë se më 3 gusht Kosova do ketë institucionet e reja, për çka ata japin disa arsye.

Politologu Mentor Tahiri, nuk beson se të enjten do të formohen institucionet e reja.

Ai thotë se çdo deklarim lidhur me numrat si nga ana e PAN, ashtu edhe nga dy blloqet tjera, është në vazhdën e një lufte psikologjike e cila ka zëvendësuar diskursin normal politik.

“Tani gjithë angazhimi i PAN është i përqendruar në sigurimin e dy-tri votave, të cilat mbase edhe mund t’i japin shumicën gjatë votimit të kryeparlamentarit dhe kryeministrit të ri, por që në fakt nuk përbën një shumicë parlamentare të qëndrueshme, madje një qeveri e tillë do ta ketë të pamundur të procedoj edhe me ligje krejtësisht të thjeshta. Edhe sikurse PAN të arrijë të sigurojë votat për të kryer emërimet institucionale konform më marrëveshjen që kanë tri rrymat politike të cilat e përbëjnë, Kosova sërish futet në një krizë institucionale pikërisht për shkak se shumica parlamentare do të jetë e brishtë dhe e ndryshueshmec”, thotë Tahiri për tesheshi.com.

Sipas tij e vetmja mundësia të shmanget një krizë e re, është krijimi i një shumice parlamentare të qëndrueshme, të ndërtuar mbi bazën e harmonizimit të programeve dhe ideve konkrete për të zhvilluar vendin.

Ndërsa njohësi i rrethanave politike, Faik Krasniqi pohon se deri më datë 3 gusht koalicioni PAN me çdo kusht do të tentojnë formimin e qeverisë, qoftë edhe duke kontrabanduar deputetë të partive tjera, edhe pse mund të prodhojë qeveri të pakicës dhe aspak stabile.

“Për momentin koalicioni PAN nuk besoj që i ka votat për zgjedhjen e kryekuvendarit dhe formimin e qeverisë, gjithnjë sipas fjalëve të koalicionit LAA, edhe pse nuk është shumë për tju besuar. Sa i përket VV-së ata në asnjë mënyrë nuk e votojnë dhe nuk i bashkohen koalicionit PAN. Nëse presidenti Thaçi respekton Kushtetutën e Kosovës, atëherë nuk do të kemi një krizë të re politike, një bllokadë siç kishim në vitin 2014. Respektimi i Kushtetutës nga ana e presidentit do të thotë se, nëse mandatari i parë nuk arrin ta formojë qeverinë brenda afateve ligjore, atëherë presidenti është i obliguar që mandatin t’ia kaloj partisë ose koalicionit që garanton se ka votat e mjaftueshme për formimin e qeverisë. Mirëpo, nëse Presidenti shkel Kushtetutën duke e favorizuar PAN-in, atëherë kriza do të jetë akoma më e thellë se para tre viteve”, thotë Krasniqi.

Sipas tij, rol të madh në formimin e qeverisë do luajnë ndërkombëtarët të cilët nuk do të lejojnë që Thaçi të krijojë krizë institucionale, pavarësisht skenarëve të mirë përgatitura nga “Klani Pronto”.

Kujtojmë se deputeti i AAK-së Rasim Selmanaj në një intervistë dhënë sot për mediat ka thënë se nëse nuk arrinë të zgjedhin qeverinë më 3 gusht, një ditë më vonë gjithësesi do të ndodhë një gjë e tillë. /tesheshi.com/