Nga Mensur Krasniqi
Ka vijuar dhe këtë të enjte seanca gjyqësore për rastin “Lagjja e Trimave” në Kumanovë. Ndryshe nga një ditë më partë ku në fazën e fjalive përfundimtare foli avokatja e të akuzuarve, sot rradhën e kishin të akuzuarit. Protagonist kryesorë ishin dy liderët e grupit të armatosur shqipëtar të UÇK-së nga Kosova, Sami Ukshini i njohur si Komandant Sokoli dhe Genc Sefaj.
Sipas Ukshinit, bashkëluftarët e tij janë ekzekutuar nga policia maqedonase pas dorëzimit, pasi nuk kanë pranuar të marrin 5 milionë euro nga njerëz të pushtetit, në mënyrë që të heshtin.
Sokoli madje tha se ekziston një incizim, pa saktësuar nëse është audio ose vizual, ku shihet tregtia që shërbimet sekrete kanë dashur ta bëjnë me lidrët e grupit.
“Ekziston një incizim i atyre dy djemve kur ju keni ofruar para, 5 milionë euro, por nuk kanë pranu, dhe i keni vra, ekzekutu… E dini prej kujt, prej shërbimit të presidentit dhe atë shërbimin që e ka kontrollu ish-kryeministri Nikolla Gruevski. Nëse jemi terrorist siç thoni, cili shtet normal bën pazar me një grup terrorist”, ka thënë Sokoli.
Në momentin që Sokoli filloi ta quaj gjykatën dhe prokurorinë si të kriminalizuar dhe korruptuar, gjykatësja Verka Petroska ia ndaloi fjalën dhe i tha që nuk mund të vazhdojë ta ofendoj atë dhe gjykatën, por ndaj kësaj ndalese reaguan ashpër si pjesëtarët e grupit ashtu edhe avokatët dhe pas këtij insistimi dhe reagimi Sokoli u la të vazhdojë me fjalimin.
Në vazhdim, Komandant Sokoli ka dashur të dijë nga Prokuroria se kush për çfarë motive kanë ardhur të luftojnë, pasi që pohimet e tyre se pjesëtarët e grupit kanë ardhur për qëllime politike dhe për para janë shumë të rënda. Për këto akuza sipas tij nevojiten prova të forta.
Sokoli i acaruar akuzoi shtetin maqedonas edhe si fajtor për vrasjen e fëmijëve maqedonas në liqenin e Smillkovës, vetëm për t’i akuzuar shqiptarët.
“Ju jeni një mekanizëm tjetër kriminel i një shteti që dëshiron të na dënoj për terrorizëm. I keni vrarë fëmijët në Smillkovcë për t’i akuzuar shqiptarët, ju kanë ndihmuar edhe serbët”, vazhdoi fjalimin e tij përfundimtar Sokoli.
Këto fjalë të Sokolit u konsideruan si të tepërta nga gjykatësja Verka Petrovska e cila ia ndërpreu fjalimin atij.
“Mjaft ju durova heshtni, ju durova të më ofendoni mua e tani edhe shtetin. Nëse nuk flisni për rastin ndaloni. Si dolët tek Monstra” , i tha Verka Petrovska, Sami Ukshinit.
Ndërsa sipas të akuzuarit tjetër, Genc Sefajt, luftimi në Kumanovë nuk është zhvilluar ndërmjet grupit të armatosur dhe policisë, por luftë e pushtetit e montuar kundër tyre dhe policisë që ishin viktimë e kësaj loje.
“Këtu si njerëzit tanë e po ashtu edhe policët e dinë se ka vetëm një organizator. Të njëjtin na vranë edhe neve edhe policët. E, ai grup ka qenë në pushtet”, ka thënë ai.
Në fund Sefaj tha: “Patët një shans për ta korrigjuar këtë padrejtësi të madhe. Pasojat e kësaj çorbe që e provuam e u përgatitën nga kuzhina e shërbimeve sekrete”.
Bilanci i të vdekurve në konfliktin e armatosur të Lagjes së Trimave është 8 policë maqedonas dhe 10 pjesëtarë të grupit të UÇK-së. Përveç tyre edhe dhjetëra të tjerë u plagosën, ndërsa 30 pejstarë të grupit që përbëhej kryesisht nga shtetas të Kosovës u arrestuan. /tesheshi.com/
