Pas qëndrimit të prerë të Ilir Metës që ka kaluar nga mbrojtje në “llogore” në sulm, duke i kërkuar Edi Ramës largimin e ministrave që ai i shikon si antagonistë dhe nxitës së zhurmës së CEZ, por dhe të tjera, kryeministrit sot i ka ardhur për herë të parë presioni nga brenda kabinetit të tij.
Nasip Naço, Ministri i Drejtësisë, që përbën një nga anëtarët më të rëndësishëm të kabinetit, ka bërë thirrje për ndryshime në qeveri.
Duke folur para gazetarëve, Naço ka përforcuar shefin e tij Ilir Meta për impulset e reja por ka përmendur dhe dy përcaktime: “malore dhe fushore”, të cilat edhe pse dukeshin si kode nuk bëhej fjalë për poste por për emra.
“Për këtë pyesni kryeministrin, por sigurisht që ka nevojë. Madje duhet të ketë impulse të reja dhe për ju gazetarët”. Ndërsa pyetjes nëse Ministri i Brendshëm Tahiri do të shkonte tek Drejtësia Naço iu përgjigj: “Ka nevojë për impulse malore dhe fushore”.
Situata tashmë bëhet më e ngarkuar, pasi siç mësohet, Ilir Meta i kërkon ndryshimet shumë shpejt. Që këtë javë dhe po angazhon një establishment të rëndë të qarqeve politike dhe mediatike. Një burim diplomatik i tha tesheshi.com, se bëhet fjalë për një vullnet politik që është bërë i qartë dhe synon të kryhet përpara se Meta të shkojë në një vizitë në SHBA, ku ende nuk është e bërë e qartë axhenda.
Konkretisht, Meta kërkon me ngulm largimin e Saimir Tahirit dhe Damian Gjiknurit, normalisht edhe të Ilir Beqjes. Po përse këto ministra?
Kjo mbetet ende një tezë në zhvillim, por siç bëjnë të ditur qarqe pranë kreut të LSI-së, Ilir Meta mendon se nga dikasteret e drejtuara nga Tahiri dhe Gjiknuri, kanë “udhëtuar” dokumente të rëndësishme që do të jenë pjesë e arbitrazheve apo hetimeve ndërkombëtare. Dhe në këtë rast nuk bëhet fjalë vetëm për rastin “CEZ”.
Ndërkohë Edi Rama, në mbledhjen e së hënës para deputetëve të tij tha shkoqur: “kush kërkon ndryshime në qeveri është kundër aleancës”.
Lind pyetja, a është Nasip Naço, ministri i Drejtësisë dhe LSI-ja, pjesë e aleancës me Ramën?!
Kjo është vërtetë dilema, që siç tha para pak ditësh avokat Ngjela: “të presim dhe këtë muaj”…/tesheshi.com/
